Prezidentin xarici siyasəti xalqın gözündə

Sosial Tədqiqatlar Mərkəzi əhalinin mövqeyini öyrənib; vətəndaşlar və deputat deyir ki...
Sosial Tədqiqatlar Mərkəzi Azərbaycan Respublikası Prezidentinin fəaliyyətinə ictimai münasibətin öyrənilməsi məqsədilə ölkə vətəndaşları arasında rəy sorğusu həyata keçirib.

Mərkəzdən verilən xəbərə görə, sorğu çərçivəsində 2025-ci ilin ilk altı ayı ərzində Prezidentin genişmiqyaslı fəaliyyət xronikasında ön plana çıxan və xüsusi aktuallıq kəsb edən bir sıra istiqamətlər seçilərək ictimai rəy sorğusu əsasında dəyərləndirilib.

Sorğunun nəticələri Prezidentin fəaliyyətinin ümumilikdə yüksək qiymətləndirildiyini göstərib. Xüsusilə “Böyük qayıdış” və bərpa-quruculuq, xarici siyasət, hərbi quruculuq və milli təhlükəsizlik sahəsində fəaliyyətə geniş ictimai dəstək ifadə olunub.

Sorğunun nəticələrinə əsasən, Prezidentin xarici siyasət sahəsində fəaliyyətini respondentlərin 67.8%-i çox yaxşı, 24.4%-i əsasən yaxşı olaraq qiymətləndirib. Sorğu iştirakçılarının 1.0%-i bu sahədə fəaliyyəti əsasən pis, 0.6%-i çox pis kimi dəyərləndirib. Respondentlərin 6.2%-i bu barədə rəy bildirməkdə çətinlik çəkib.

Nəticələr Azərbaycanın xarici siyasət kursuna - xüsusən regional əməkdaşlıq, geosiyasi balanslaşdırma və beynəlxalq təşkilatlarla əməkdaşlıq sahəsində fəaliyyətə yüksək ictimai dəstəyin olduğunu göstərib. Tədqiqat kəmiyyət metodologiyası əsasında aparılıb. Topludan nümunənin seçilməsində ehtimallı seçmənin çoxpilləli stratifikasiya üsulundan istifadə olunub. Seçmə çərçivəsi respondentlərin gender balansı, təhsil səviyyəsi və yaş bölgüsü rəsmi statistikaya uyğun olmaqla müəyyən edilib.

Sorğularda yaşı 18 və yuxarı olan 1200 respondent iştirak edib. Sorğunun sahə işi (məlumatların toplanılması) 2025-ci ilin 10-18 iyun tarixləri arasında icra edilib. Məlumatların toplanılmasında kompüter dəstəkli fərdi müsahibə (CAPI) üsulundan istifadə olunub. Sorğular Bakı, Abşeron-Xızı, Dağlıq Şirvan, Gəncə-Daşkəsən, Qazax-Tovuz, Lənkəran-Astara, Quba-Xaçmaz, Şəki-Zaqatala, Qarabağ, Mərkəzi Aran, Mil-Muğan və Şirvan-Salyan iqtisadi rayonlarını əhatə edib. Naxçıvan və Şərqi Zəngəzur iqtisadi rayonları sorğuda əhatə olunmayıb. Sorğular 7 respublika tabeli şəhər, 34 rayon olmaqla, ümumilikdə ölkənin 41 rayon və şəhərində keçirilib.

Sahə işinə başlamamışdan əvvəl intervüyerlər təlimatlandırılıb. Həmçinin onlar tərəfindən bütün müsahibələrdə anonimlik təmin edilib, respondentlərə sorğunun könüllü iştirak əsasında aparıldığı, nəticələrin yalnız tədqiqat məqsədləri üçün istifadə ediləcəyi barədə məlumatlar verilib. Sorğuda iştirak edənlərin sayına əsasən nəticələrin xəta əmsalı 95% əminlik intervalında 3% təşkil edib. Nəticələr göstərir ki, Prezidentin Azərbaycan ictimai rəyində reytinqi yüksəkdir və əhalinin böyük əksəriyyəti fəaliyyətindən razıdır.

Bəs sorğunun nəticələri həm də nədən xəbər verir? Bu, hakimiyyətin aparıldığı xarici siyasətin yaratdığı reallıqlardan irəli gəlirmi?

Deputat Arzuxan Əlizadə “Yeni Müsavat”ın sualına cavabında qeyd etdi ki, sorğunun nəticələri kifayət qədər obyektivdir və həqiqəti əks etdirir. Onun sözlərinə görə, Vətən müharibəsində əldə olunan qələbə və üç il sonra antiterror əməliyyatı nəticəsində suverenliyin bərpası sözsüz ki, xalqın Azərbaycan Prezidentinə olan müsbət münasibətini daha da artırıb.

A.Əlizadə vurğuladı ki, azad olunan ərazilərdə abadlıq-quruculuq işləri, qayıdış konsepsiyasının həyata keçirilməsi, Qarabağda hava limanları, nəhəng infrastruktur layihələrinin reallaşması uğurlarımızdır və xalq tərəfindən təqdir olunur: “Dövlət başçısının xarici siyasəti regionda və qlobal miqyasda ölkəmizin əhəmiyyətini daha da artırmaqdadır.

Həmçinin Azərbaycanın beynəlxalq təşkilatlarda iştirakı, yəni Qoşulmama Hərəkatında, İslam Əməkdaşlıq Təşkilatında və digər platformalarda oynadığı rol ölkəmizin beynəlxalq imicini xeyli dərəcədə artırıb, regionun bir nömrəli dövlətinə çevrilməsinə səbəb olub. Bu da şübhəsiz ki, Prezident İlham Əliyevin yürütdüyü siyasətin nəticəsidir.

Eyni zamanda Azərbaycanın Türk Dövlətləri Təşkilatında fəaliyyəti, Xankəndidə İqtisadi Əməkdaşlıq Təşkilatının 17-ci Zirvə toplantısının keçirilməsi həm beynəlxalq aləmdə mövqeyimizi gücləndirir, həm də bu addımlar əhali tərəfindən yüksək qiymətləndirilir. Yəni rəy sorğusu reallığı əks etdirir". Deputat bildirdi ki ölkə daxilində də həllini gözləyən, vətəndaşları narahat edən məsələlər var və dövlət bu istiqamətdə addımlar atır: “Ümumilikdə isə sorğu Prezidentin xarici siyasəti ilə bağlı olub və nəticələri təəccüb doğurmur. Çünki son illər diplomatik cəbhədə Azərbaycan uğurlu gedişlər edib. Xüsusən də Ermənistanla münasibətlərin tənzimlənməsi və sülh prosesində böyük məsafə qət etmişik. Bura sülh mətninin razılaşdırılması, Qazağın işğal altında olan 4 kəndinin geri alınması, həmin istiqamətdə ilk dəfə sərhədin dəqiqləşdirilməsi qeyd olunmalıdır. Bundan əlavə, rəsmi Bakının yekun sülh sənədi ilə bağlı məlum iki tələbi dəyişməyib, cənab Prezident bütün platformalarda bu prinsipial mövqeyimizi diqqətə çatdırır və İrəvanın şərtlərimizi yerinə yetirməli olduğunu vurğulayır. Bu baxımdan, əhali dövlət başçısına güvənir, milli maraqlarımızın qorunmasında ona böyük etimadı var və xalq bilir ki, prezident Azərbaycanın istəklərinə zidd hər hansı addımı atmaz. Son olaraq da Əbu-Dabidə baş tutan görüş bir daha göstərdi ki, Azərbaycan Prezidenti sülh müqaviləsinin imzalanması prosesində hansı prinsipial mövqedən çıxış etməkdədir”.

Tarix: 11-07-2025, 16:00 Oxunub: 26