BMT Azərbaycanın multikulturalizmin təşviqi sahəsindəki səylərini tam dəstəkləyir

Azərbaycan Respublikası Asiya və Avropa qitələrinin qovuşağında yerləşməklə, olduqca əlverişli iqtisadi coğrafi mövqeyə malikdır. Son illərdə ölkəmizin həm iqtisadi, həm də siyasi sahədə mövqeyi onun dünya ölkələri arasında əhəmiyyətini daha da artırmışdır. Ölkəmiz coğrafi mövqeyi, tarixi inkişaf xüsusiyyətləri burada müxtəlif xalqların nümayəndələrinin məskunlaşmasına səbəb olmuşdur. Əhalinin etnik tərkibinin müxtəlifliyi həmçinin bu ərazidə fərqli dinlərin yayılmasına şərait yaratmışdır. Azərbaycan Respublikasında yaşayan xalqların nümayəndələrinin dil və adət-ənənələrinin fərqliliyi də özünəməxsusluğu ilə nəzərə çarpır. Tarixən fərqli dil, din və mədəniyyətlərə malik xalqların məskəni olmuş və inkişafına şərait yaratmış Azərbaycan, bugün də bu işi uğurla davam etdirir. Hazırda Azərbaycan əhalisinin tərkibi həm etnik, həm dini baxımdan zəngindir. İlk insan məskənlərindən biri olan Azərbaycan, həm də multikulturalizmin və dözümlülük mədəniyyətinin formalaşdığı ölkələrdən biridir. Belə ki, ərazimizdə min illər öncə formalaşmış tolerantlıq ənənələri illər boyunca yeni xüsusiyyətlər qazanmış və bu coğrafiyada yaşayan insanların əsas keyfiyyətlərindən birinə çevrilmişdir.
Azərbaycanda dini münasibətlərinin tənzimlənməsi, müxtəlif dinlər arasında dözümlülük mühitinin qorunub saxlanılması ulu öndər Heydər Əliyevin adı ilə bağlıdır. O, tolerantlıq mühitinin dövlət-din konsepsiyasına uyğun möhkəmləndirilməsinə nail olmuşdur.
Ulu öndər Heydər Əliyevin söylədiyi kimi "Azərbaycan onun ərazisində yaşayan bütün millət və xalqların ümumi vətənidir. Ərazimizdə yaşayan azərbaycanlı da, ləzgi də, avar da, kürd də, talış da, udin də, kumık da, başqası da-bütünlükdə hamısı azərbaycanlıdır".
Müxtəlif tarixi dövrlərdə Azərbaycan ərazisində məskunlaşmış dini-etnik qruplar burada özlərini yad hesab etməmiş, əksinə yerli əhali ilə qaynayıb-qarışmış, qohumluq əlaqələri qurmuşlar. Fərqli etnik qrupların nümayəndələri hər zaman Azərbaycan xalqı ilə həmrəy olmuş, vahid Vətənimizin azadlığı və firavanlığı uğrunda mübarizə aparmışlar.
Hazırda dünya ölkələri, eləcə də beynəlxalq qurumlar prezident İlham Əliyevin də söylədiyi kimi “BMT Azərbaycanın multikulturalizmin təşviqi sahəsindəki səylərini tam dəstəkləyir. Ölkəmizin təşəbbüsü ilə mütəmadi olaraq keçirilən Ümumdünya Mədəniyyətlərarası Dialoq Forumu müxtəlif sivilizasiyaların nümayəndələri arasında təmasların daha nəticəyönümlü olması üçün unikal platformadır.”
Prezident İlham Əliyev həmçinin 2 oktyabr tarixində 74-cü Beynəlxalq Astronavtika Konqresinin açılış mərasimində etdiyi çıxışında onu da qeyd etmişdir ki, Azərbaycanın əsrlər boyu çoxmədəniyyətli və çoxkonfessiyalı cəmiyyətə malik olmuş, biz bunu sabitliyin, proqnozlaşdırmanın və Azərbaycanda yaşayan bütün etnik qrupların və bütün dini konfessiyaların dinc birgə yaşayışı üçün əhəmiyyətli faktor olduğunu hesab edirik.

Maştağa qəsəbəsi, 293№li tam orta məktəbin
Müəllimi Aidə Abbasova

Tarix: 4-10-2023, 11:13 Oxunub: 69