Eltun Süleymanov: “Qələbəmizin qətiliyi və dönməzliyi bir daha təsdiq edildi”

“Son üç ildə hər gün Azərbaycan tarixində mühüm hadisələrlə zəngindir. Bu zəngin tarixə hər gün yeni səhifələr yazan da Azərbaycanın Müzəffər Ali Baş Komandanı, mahir diplomat, qalib sərkərdə cənab İlham Əliyevdir. 3 ay bundan əvvəl birgünlük antiterror əməliyyatının keçirilməsi əmrini verən və bu əməliyyatı böyük müvəffəqiyyətlə başa çatdıran cənab Prezident işğaldan azad olunmuş torpaqlarımızı qarış-qarış gəzir, bu ərazilərdə aparılan bərpa quruculuq işləri ilə yaxından tanış olur.
Tarixi günlərdən biri də Xankəndi şəhərində Azərbaycan bayrağının dalğalanması günü oldu. 15 oktyabr 2023-cü il tarixə bu adla yazıldı. O vaxtdan bəri tarixi şəhərimiz Xankəndidə aparılan abadlıq, quruculuq işləri ölkə rəhbərinin diqqət mərkəzindədir.
Dünən isə xalqımız daha bir tarixi hadisəyə şahidlik etdi. Xankəndi stadionunda futbol üzrə Azərbaycan Kubokunun 1/8 final mərhələsində Ağdamın “Qarabağ” və Bakının MOİK komandaları qarşılaşdı. Azərbaycan Respublikasının Prezidenti İlham Əliyev və birinci xanım Mehriban Əliyeva oyuna baxmaq üçün stadiona gəlmişdilər.
Dövlətimizin başçısı oyundan əvvəl stadionda çıxış etdi. Qəhrəman şəhidlərimizin uşaqlarının, ailə üzvlərinin stadionda olduğunu qeyd edən ölkə başçısı tamaşaçılarla birlikdə onları salamladı və çıxış etdi.
Bu qısa, lakin tarixi çıxışın çox böyük mənası var. İlk dəfə idi ki, Azərbaycan xalqı Xankəndi stadionundan cənab Prezidentin çıxışını dinləyirdi. İlk dəfə bu stadionda milli komandalarımızın oyunu keçirilir və oyuna tarixi torpaqlarımızın azadlığı uğrunda şəhadətə ucalmış soydaşlarımızın övladları bu tarixi günə şahidlik edirdilər.”

Bu sözləri aia.az-a verdiyi açıqlamada Nəsimi RİH-nin yanında İctimai Şuranın sədr müavini Eltun Süleymanov deyib.

Müsahibimiz qeyd edib ki, “Azərbaycan Prezidentinin çıxışı nikbin notlar üzərində qurulmuşdu. Futbol matçının bu tarixi şəhərdə keçirilməsinn çox böyük rəmzi mənası olduğunu bildirən ölkə başçısı qeyd etdi ki, “Bu kəndin təməli Qarabağ xanı tərəfindən qoyulmuşdur və ondan sonra Azərbaycan Respublikasının vəsaiti hesabına Azərbaycan memarları, inşaatçıları tərəfindən böyük şəhər yaradılmışdır. Əfsuslar olsun ki, 30 il ərzində bu şəhərdə separatçılar yuva salmışdılar. Bu şəhər separatizmin rəmzinə çevrilmişdi. Torpaqlarımızı 30 il ərzində işğal altında saxlayan Ermənistan hesab edirdi ki, bunu əbədi edə biləcək. Biz, şanlı Azərbaycan Ordusu onlara və bütün dünyaya sübut etdik ki, bu, bizim tarixi, əzəli torpağımızdır. Bu torpaqların sahibləri bizik, Azərbaycan xalqıdır. Biz buraya qayıtmalı idik və qayıtmışıq.”
Üç ay bundan əvvəl bu gözəl şəhərin işğalçılardan və separatçılardan azad edildiyini, şəhərdə o gündən bəri üçrəngli bayrağımızın dalğalandığını qeyd edən cənab Prezident bunu tarixi hadisə adlandıraraq bu tarixin bizim qəlbimizdə əbədi yaşayacağını, Azərbaycan xalqının, dünya azərbaycanlılarının Zəfərlə əbədi fəxr edəcəklərini bildirdi.
İşğaldan azad olunan əraizlərdə aparılan bərpa-quruculuq işlərinə toxunan cənab Prezident qeyd etdu ki, “Bu stadion cəmi iki ay ərzində, demək olar ki, yenidən inşa edilmişdir, əsaslı təmir olunmuşdur. Separatizm simvolikasını əks etdirən bütün yazılar artıq tarixin zibilxanasına atıldı. Bütün başqa şəhərlər kimi, bu gün Ağdam şəhəri də yenidən qurulur. O cümlədən bir neçə aydan sonra Ağdam şəhərində “İmarət” stadionunun yenidən inşa edilməsinə başlanılacaq.”
Ölkəmizin başçısı bu oyunun qalibinin ilk növbədə Azərbaycan xalqı, onun qəhrəman övladlarından ibarət yeniməz ordusu olduğunu qeyd edərək bildirdi: “Bugünkü oyunun nəticələrindən asılı olmayaraq qalib bəllidir. Qalib Azərbaycan xalqıdır, Azərbaycan dövlətidir! Bugünkü oyunda “Qarabağ” və Mərkəzi Ordu İdman Klubunun qarşılaşması təbii ki, böyük rəmzi məna daşıyır. Qarabağ–Ordu-Xalq birliyi bizim Zəfərimizin əsas mənbəyidir.”
Eltun Süleymanov sonda qeyd etmişdir ki, nitqini “Bundan sonra bu torpaqlarda Azərbaycan Bayrağı əbədi dalğalanacaq. Biz azərbaycanlılar burada əbədi yaşayacağıq! Yaşasın Qarabağ! Yaşasın şanlı Ordumuz! Qarabağ Azərbaycandır!”- nidası ilə bitirən ölkə başçısı bir daha hamıya mesaj verdi ki, bizim qələbəmiz dönməzdir, qətidir və Azərbaycan xalqı öz müdrik Liderinin rəhbərliyi altında mübarizəsini davam etdirəcəkdir.”

Tarix: 22-12-2023, 12:40 Oxunub: 36