Novruz ümumxalq bayramı kimi uzun əsrlərdən bəri ölkəmizdə qeyd edilir

Hər bir xalqın özünəməxsus xüsusiyyətləri, milli adət-ənənələri, eləcə də bayramları mövcuddur. Bunlar həmin xalqların var olduğunu, digərlərindən fərqliliyini və toplumların dünya mədəniyyətinə verdikləri töhfələri, bir tərəfdən də özlərinin mədəni inkişafını əks etdirir. Hazırda xalqımızın qeyd etdiyi Novruz bayramı da Azərbaycan xalqının ən qədim bayramlarından biridir.
Novruz ümumxalq bayramı kimi uzun əsrlərdən bəri ölkəmizdə qeyd edilir. Bu münasibətlə müxtəlif el şənlikləri, mərasimlərlər təşkil edilir. Qədim adət-ənənələrin bugünə kimi qorunub saxlanılması, xalqımızın öz tarixi-mədəni keçmişinə ehtiramı və milli-mənəvi dəyərlərinə dərin bağlılığının göstəricisidir. Artıq bir neçə ildir ki, bu bayramın gəlişinə daha böyük həvəslə hazırlaşıb, könül rahatlığı ilə qeyd edə bilirik.
Qeyd edək ki, uzun illər idi ki, torpaqlarımızın 20 faizinin işğal altında olması və yurdlarından didərgin düşmüş soydaşlarımızın narahatlığı, sanki bayramlarımızın yüksək əhval ilə keçirilməsinə marağı azaltmış, sevincimizi əlimizdən almışdır. Nəhayət 44 günlük Vətən müharibəsindən sonra 30 ilə yaxın işğal altında qalan torpaqlarımız geri qaytarıldı və uzun illərin yurd həsrətinə son qoyuldu. Düşmən tapdağında qalıb talanmış, dağıdılmış yaşayış məskənlərimizi, ərazinin sosial- iqtisadi inkişafını, infrastruktur şəraitini bərpa və yenidənqurma üçün genişmiqyaslı tədbirlər həyata keçirilməyə başlanıldı. Məhz dövlətimizin dəstəyi ilə genişmiqyaslı yenidənqurma işlərin surətli həyata keçirilməsi və insanların yurdlarına olan sevgisi sayəsində hazırda azad edilmiş torpaqlarımızda bayram abu-havası müşahidə olunur. Son üç ildə Prezident İlham Əliyev Novruz bayramını işğaldan azad olunmuş rayonlarımızda edir. Martın 18-də Azərbaycan xalqını Xankəndi şəhərindən təbrik edən Prezident İlham Əliyev, Novruz tonqalının işğaldan azad edilmiş Qarabağ torpaqlarında qalandığının söyləmişdir. O, qeyd edib ki, “Dördüncü dəfədir ki, bayram tonqalını mən azad edilmiş Qarabağ torpağında qalayıram. 2021-ci ildə Şuşada, 2022-ci ildə Suqovuşanda, keçən il Talış kəndində, bu dəfə isə Xankəndi şəhərində bayram tonqalı qalanır. Bu, böyük xoşbəxtlikdir.” Daha sonra ölkə rəhbəri çıxışında antiterror əməliyyatı nəticəsində suverenliyimizi tam bərpa edib, ölkəmizin ərazi bütövlüyünün tamamilə təmin edildiyini vurğulamışdır. Həmçinin ölkəmizin bu qələbəsi, torpaqlarının azad olunması üçün uzun illər mühüm səylər göstərildiyini diqqətə çatdırmış, ərazi bütövlüyümüzün bərpa olunduğunu və bundan sonra bu torpaqlarda daima yaşayacağımızı söyləmişdir.
Qeyd edək ki, azad edilmiş torpaqlarımızda hər qalanan tonqalı qurur və fərəh hissi ilə seyr edir, əsil bayram abu-havası yaşayırıq. İllərdir torpaq həsrəti ilə yaşayan soydaşlarımızın bayramlarını öz yurd-yuvalarında qeyd edə bilməsi hər birimizi çox sevindirir.
Maştağa qəsəbəsi, 293№li tam orta məktəbin
Coğrafiya müəllimiAidə Abbasova

Tarix: 21-03-2024, 17:10 Oxunub: 102