Ordum varsa, Yurdum var!

2020-cil il 10 dekabrda Bakı şəhərində möhtəşəm Zəfər paradı keçirildi. 3 mindən çox Azərbaycan, türk əsgər və zabitlərinin iştirak etdiyi bu parad əzəmət, birlik, qardaşlıq mücəssəməsi oldu. Bu, uzun illərdir Azərbaycan xalqının həsrətlə gözlədiyi qələbə sevincini özündə daşıyan, şəhidlərimizin müqəddəs qanları hesabına qazanılan zəfərin əsas simgəsi olan birgəlik yürüşü idi. 150-dək hərbi texnika, o cümlədən silahlanmaya yeni qəbul edilmiş müasir hərbi texnika, raket və artilleriya qurğuları, hava hücumundan müdafiə sistemləri, eləcə də hərbi gəmi və katerlərin nümayiş olunması Azərbaycanın hərbi gücünün dünyaya nümayişidir. Düşməndən qənimət kimi ələ keçirilmiş hərbi texnikanın bir qisminin paradda göstərilməsi ermənilərin və onların himayədarlarının hərbi gücünün süqutu idi.
Bir vaxtlar Azərbaycanımızın səmasında olan qara buludlar artıq öz yerini günəşli və aydın sabahlara vermişdir. Azərbaycan-türk əsgərinin yenilməz gücü işıqlı gələcəyin təminatçısı olmuşdur. Azadlıq meydanında əsgərlərimizin yeri-göyü titrədən addımları xalqımızın qürur mənbəyinə çevrilmişdir.
Özünəməxsus peşəkarlığı özündə cəmləşdirən qüdrətli Azərbaycan Ordusu uzun illər bizə qənim kəsilən mənfur düşməni 44 günə darmadağın etdi, ona acı məğlubiyyət yaşatdı.
Ali Baş Komandan cənab İlham Əliyev ətrafında bir yumruq kimi birləşən Azərbaycan Ordusu və xalqı sarsılmaz birlik nümayiş etdirdi. Heç bir yad işğalçı qüvvənin bu doğma türk yurdunda qalib olmayacağını bir daha əminliklə göstərdi. Məhz 10 dekabr Zəfər paradında qardaş Türkiyə Cümhuriyyətinin Prezidenti Rəcəb Tayyip Ərdoğanın və hökumət üzvlərinin, türk əsgərlərinin iştirakı bütün dünyaya bəyan edilən qardaş dəstəyidir.
Qəhrəman şanlı Türk Ordusu Azərbaycana tarix boyu çətin anlarda dəstək vermişdir. Tarixə nəzər yetirsək, görərik ki, 1918-ci ildə Bakı şəhərini işğalçılardan azad etmək üçün gedən döyüşlərdə qəhrəman və igid türk əsgərləri necə canlarından keçmişlər. Türkün türkdən başqa dostu yoxdur!
Silahlı Qüvvələrin Müzəffər Ali Baş Komandanı İlham Əliyevin təşəbbüsü ilə salınan Hərbi Qənimətlər Parkı bizim yaddaş yerimizə çevrilmişdir. Hər dəfə ora getdikcə müharibəni az qala bütün ağrı-acısı ilə duyursan. Vaxtilə bizə yönələn raketlərin, düşmən texnikalarının qalıqlarını gördükcə bütün dəhşətləri xatırlayırsan. Bizim igid , qəhrəman və cəsur əsgərlərimizin ən çətin bir işin öhdəsindən necə uğurla gəldiyini öz gözlərinlə görürsən. Bu da danılmazdır ki, dünyanın heç bir ordusunda qələbə əzmi Azərbaycan əsgərinin qələbə əzmindən yüksək olan bir əsgər yoxdur! Vətən Müharibəsi dövründə düşmən ordusunda fərarilik halları çoxalsa da, Azərbaycan Ordusunda heç bir belə hala rast gəlinməmişdir. Döyüş vaxtı yaralanan əsgərlərimiz belə yenidən döyüş meydanına atılmaq istəmişdir.
Vətən Müharibəsində “Zəfər” və “Qarabağ” ordenləri, həmçinin 15 yeni medal təsis olunub. Müharibədə iştirak etmiş, aparılan döyüş əməliyyatlarının uğurla nəticələnməsinə töhfə vermiş Azərbaycan Respublikası Silahlı Qüvvələrinin hərbi qulluqçuları və mülki işçiləri, habelə müvafiq qurumların ön cəbhədə fədakarlıq göstərmiş əməkdaşlar və mülki işçilər müxtəlif orden və medallarla təltif edilmişdir.
Böyük qələbənin əsasını düzgün yeridilən qərarlı siyasət təmin etmişdir. İşğalda olan Azərbaycan torpaqları barədə dünya ictimaiyyətinə dolğun məlumatın verilməsi, Azərbaycan həqiqətlərinin beynəlxalq tədbirlərdə bəyan edilməsi nəticəsində BMT Təhlükəsizlik Şurasının 4 qətnaməsi, BMT Baş Assambleyasının qətnamələri, İslam Əməkdaşlıq Təşkilatı, Qoşulmama Hərəkatı, Avropa Parlamenti və digər təşkilatlar Azərbaycanın haqq işini dəstəklədi. Bu yolda səbir və qətiyyətlə addımlayaraq öz iqtisadiyyatımızı yüksəltməklə, hərbi gücümüzü artırmaqla Şanlı Ordumuzun qələbəsinə nail olundu.
Məğlubiyyətini görən mənfur düşmən şəhərlərimizə raket zərbələri endirmiş, dinc əhali arasında itkilərə səbəb olmuşdur. Ancaq Müzəffər Ordumuz düşmənin layiqli cavabını döyüş meydanında verərək onu torpaqlarımızdan çıxmağa məcbur etmişdir. Türkün gücü düşməni məğlubiyyət aktını imzalamağa məcbur etdi. Qələbə həm siyasi, həm də hərbi meydanda qazanıldı.
Bu gun Azərbaycan-Türk Ordusunun birgə apardığı hərbi təlimlər iki qardaş dövlətin bundan sonra da bizim doğma torpaqlarımıza göz dikməyə çalışan düşmənə qarşı inamla, qorxmadan savaşacağı deməkdir. Türk birliyi var olan müddətdə gücümüz var olacaq!
Yaşasın Müzəffər Azərbaycan Ordusu!
Yaşasın qalib Azərbaycan xalqı!
Yaşasın Müzəffər Ali Baş Komandan İlham Əliyev!

Maştağa qəsəbəsi, 28 nömrəli tam orta məktəbin
Azərbaycan dili və ədəbiyyatı müəllimi Səid Babayev

Tarix: 9-12-2022, 10:01 Oxunub: 224