Azərbaycan Prezidentinin qlobal təşəbbüsləri bəşəri dəyərlərə əsaslanır

Qoşulmama Hərəkatına dörd il uğurla sədrlik etmək və bu dövrdə təşkilatın təsir dairəsini genişləndirmək, nüfuzunu qat-qat yüksəltmək yalnız və yalnız Prezident İlham Əliyev kimi uzaqgörən, bəşəriyyətin xoşbəxt gələcəyini düşünən siyasətçiyə, rəhbərə xasdır. Azərbaycan Prezidentinin təşkilata uğurlu sədrliyi üzv dövlətlər tərəfindən yüksək qiymətləndirilir və insanların sağlamlığı, rifahı naminə həyata keçirilən tədbirlər demokratik ölkələr tərəfdən dəstəklənir. Müharibə şəraitində olmasına, pandemiyanın doğurduğu çətinliklərə baxmayaraq, dövlətimizin başçısının təşəbbüsü ilə 2020-ci ilin mayında Qoşulmama Hərəkatının COVID-19-la mübarizəyə həsr olunmuş sammitinin keçirilməsi, bir çox ölkələrə humanitar yardım göstərilməsi, dünyanın əksər dövlətlərinin amansız xəstəliklə bağlı mübarizəyə cəlb edilməsi məhz Prezident İlham Əliyevin gərgin səyləri nəticəsində mümkün oldu.
Hərəkata sədrlik dövründə təşkilatın Parlament şəbəkəsinin yaradılması mühüm hadisədir və bu platformanın uğurlu perspektivlərindən xəbər verir. Bu gün Hərəkatın postpandemiyaya həsr olunmuş sammit səviyyəli görüşünün yenidən Bakıda keçirilməsi Prezident İlham Əliyev tərəfindən irəli sürülüb. Dövlətimizin başçısının görüşdəki çıxışı nəinki respublika ictimaiyyəti arasında, beynəlxalq aləmdə də geniş əks-səda yaratdı. Bu çıxışda dünyada baş verən hadisələrin, mövcud reallıqların aydın mənzərəsi verildi. Ölkə Prezidenti öz çıxışında yeni dünya düzəninin formalaşması fikrini ifadə etməklə əsas diqqəti dünyada sülhün və təhlükəsizliyin təmin edilməsinin vacibliyinə, beynəlxalq hüququn işləməməsinə, qlobal təşkilatların fəaliyyətinin səmərəli olmamasına yönəltdi.
“Bəşəri məsələlərin həllində, yeni dünya düzənində Qoşulmama Hərəkatının fəaliyyəti uğurludur. Həmçinin vacib problemlərin həllində Hərəkatın yeri mütləq müəyyənləşdirilməlidir. Bu Hərəkatın üzv dövlətlərindən biri də BMT Təhlükəsizlik Şurasında təmsil olunmalıdır. Çünki bu gün BMT Təhlükəsizlik Şurasının fəaliyyəti demək olar ki, dondurulmuş vəziyyətdədir və o, dünyada sülhün, əmin-amanlığın, demokratiyanın bərpa olunmasında öz rolunu göstərməyə qadir deyil. Azərbaycanın timsalında BMT Təhlükəsizlik Şurasının dörd qətnaməsinin 28 il müddətində yerinə yetirilməməsi, erməni təcavüzkarlarının işğal etdikləri ərazilərimizdən vaxtında çıxarılmaması buna əyani nümunədir. Qətnamə tələblərinin yerinə yetirilməməsi Təhlükəsizlik Şurasının hadisələrə ikili mövqedən yanaşmasının, təsirli tədbirlər görmək səlahiyyətində olmamasının nəticəsidir. Məhz buna görə də Prezident İlham Əliyev BMT-də islahatların aparılmasının vacibliyini öz çıxışında qeyd etdi və təşkilatın fəaliyyətsizliyini əyani faktlarla diqqətə çatdırdı. Qoşulmama Hərəkatının Bakıda keçirilən tədbiri Azərbaycanın dünyada söz sahibi olduğunu bir daha göstərir və beynəlxalq aləmdə dövlətimizin artan nüfuzunun göstəricisidir.
Namiq Muradov - YAP Sabunçu rayon təşkilatının fəal üzvü

Tarix: 4-03-2023, 12:12 Oxunub: 70