XX əsrdə Azərbaycan xalqına qarşı törədilən Xocalı faciəsi öz ağlasığmaz qəddarlığı ilə insanlıq tarixinə düşmüş qanlı soyqırımdır

Xocalı soyqırımı Azərbaycan xalqına qarşı törədilmiş misli görülməmiş vəhşilik və sözlərlə təsvir edilə bilməyəcək qəddarlıq aktıdır.
Tarixə nəzər salsaq, görərik ki, erməni millətçiləri iki əsrdən çox müddətdə xalqımıza qarşı daima düşmənçilik siyasəti aparmışdır və əminliklə deyə bilərik ki, Xocalı faciəsi həmin siyasətin qanlı təzahürüdür.
1992-ci il fevral ayının 25-dən 26-na keçən gecə Erməni silahlı qüvvələri keçmiş sovet ordusunun Xankəndində yerləşən 366 – cı alayının iştirakı ilə Xocalı şəhərinə hücum etdi və günahsız, əliyalın əhalini atəşə tutdu.
Beynəlxalq hüququn bütün norma və prinsiplərini pozan erməni millətçiləri Xocalı şəhərini tərk edən əhalini Naxçıvanlı və Pircamal kəndləri yaxınlığındakı hərbi postları tərəfindən atəşə tutaraq qətlə yetirdi, sağ qalanları isə əsir götürdü.
Çarəsiz vəziyyətdə şəhərdə qalan 2500-ə yaxın əhali isə şəhəri tərk etməyə cəhd edərək azərbaycanlıların nəzarətində olan ən yaxın məntəqəyə çatmaq istəyirdi. Lakin onların əksəriyyəti şaxtalı havada hərəkət edən zaman donvurma nəticəsində həlak oldular.
Bu qəddarlıq, misli görülməyən soyqırım, cinayət idi... Faciədən geriyə qalan faktlar və statistika isə tükürpədicidir...
Belə ki, Soyqırım zamanı 106 qadın, 63 uşaq və 70 yaşlı insan olmaqla 613 nəfər qətlə yetirildi. 1275 nəfər girov götürüldü. 150 nəfərin taleyindən isə bu günədək xəbər yoxdur.
Dəhşətli faciəni törədən erməni faşistləri 8 ailənin tamamilə məhv edilməsinə, 25 uşağn hər iki valideynini, 130 uşağın bir valideynini itirməsinə, 187 nəfər Xocalılının ciddi şəkildə şikəst edilməsinə, 56 nəfərin diri – diri yandırılaraq, başının dərisi soyularaq, gözləri çıxarılaraq, hamilə qadınların qarın boşluğuna süngü ilə vurularaq öldürülməsinə səbəb oldular.
Cinayətin dəhşətli statistikası isə davam edirdi... Belə ki, Xocalı şəhəri yerlə - yeksan edilmiş və xarabalığa çevrilmişdi...
Ulu Öndər Heydər Əliyevin təşəbbüsü ilə 1994-cü ilin fevral ayının 24 – də Milli Məclis “Xocalı soyqırımı günü haqqında” qərar qəbul etdi.
XX əsrdə Azərbaycan xalqına qarşı törədilən Xocalı faciəsi öz ağlasığmaz qəddarlığı ilə insanlıq tarixinə düşmüş qanlı soyqırımdır.
Xocalı soyqırımının dünya ictimaiyyəti tərəfindən tanınması, ona hüquqi və siyasi qiymət verilməsi üçün dövlətimiz tərəfindən daima müvafiq işlər aparılır.
Bəli, bu gün Xocalının qisası alınıb, Xocalı şəhidlərinin qanı yerdə qalmayıb...
Xocalı şəhəri 2023 – cü il sentyabr 19 – 20 – də Azərbaycan ordusunun Qarabağda keçirdiyi lokal xarakterli antiterror tədbirləri nəticəsində separatçılardan təmizlənib.
Azərbaycan Respublikasının Prezidenti İlham Əliyev 2023 – cü il oktyabrın 15 – də Xocalı şəhərində Azərbaycan Respublikasının Dövlət Bayrağını ucaldıb.
Bəli, bizlər tariximizin hər bir səhifəsini əzbərləyib, qan yaddaşımıza yazmalıyıq.
Unutmayıb və unutdurmamalıyıq!

Sabunçu qəsəbəsi, 155 nömrəli tam orta məktəbin
laborantı Cahan Mahmudova

Tarix: 21-02-2024, 12:01 Oxunub: 76