Deputatlar Türkiyəyə yardım ediblər? - SORĞU » Xeberim.info.az İnformasiya Agentliyi

Türkiyəyə yardımla bağlı Bakıda təşkil edilən kampaniyaya Milli Məclisin deputatları da qoşulublar.

Pravda.az bu barədə parlament üzvləri arasında nə qədər maliyyə yardımı etdikləri ilə bağlı sorğu keçirib.

Milli Məclisin Regional məsələlər komitəsinin sədri Siyavuş Novruzov yardımla bağlı hər hansı məbləğ açıqlamayıb:

“Deputatlar hansı formada yardım edəcəklərsə, mən də ona qoşulacağam. Bank hesablarını bu gün götürmüşəm. Nə qədər məbləğ məsələhət olsa, o qədər ödəyəcəyik”.

Milli Məclisin deputatı Tahir Kərimli isə deyib ki, parlament tərəfindən Türkiyəyə ciddi şəkildə kömək göndəriləcək:

“Bu gün komitə iclasında da demişəm, xalqımdan o qədər razıyam ki... Başımızı uca etdilər, Türkiyəyə vətən kimi baxdılar. Xalqımızın fəallığı, yardım kampaniyasında iştirakı, həqiqətən, qürurverucidir. Xalqımıza halal olsun! Deputatlarla öz aramızda söhbət aparmışıq. İstəyirik ki, cəm şəkildə, hamımız birləşib, qiymətli nəsə göndərək. Artıq məsələ qərarlaşıb. Allahın izni ilə, generatorlar alınıb, yola salınacaq. Mən artıq maliyyə yardımımı göstərdim. Amma miqdarı demək istəmirəm. Hamı gücü çatdığı qədər kömək edir... Ciddi şəkildə köməyimiz olacaq. Heç kim narahat olmasın, mütləq olacaq. Rayonlarla əlaqəmiz var. Orada da yardım yığırlar. Deyirlər ki, ehtiyac yoxdur, amma insanlar özləri kütləvi şəkildə yardım edirlər. Çox yaxşı haldır”.

Milli Məclisin deputatı Ceyhun Məmmədov isə bildirib ki, hazırda Bakıda deyil, xaricdədir:

“Bu günlərdə Bakıya qayıdacağam. Düşünürəm ki, mən də yardım aksiyasına qoşulum. Artıq təhlil edirəm, müəyyən məsələlərə baxıram. Qayıdandan sonra vəziyyətə uyğun olaraq mən də Türkiyədəki qardaş-bacılarımıza dəstək olmağı düşünürəm. Allah dünyasını dəyişənlərə rəhmət etsin, yaralılara şəfa versin”.

Milli Məclisin deputatı Fazil Mustafa qeyd edib ki, bu məsələ ilə bağlı artıq tədbirlər görülür:

“Türkiyəyə dəstək üçün hansı variantlar varsa, onu həll edirik. Xüsusi hesaba maddi yardım göndərdim, maaşımdan köçürdüm. Lazımi geyim və digər vasitələri də toplayırıq. Yəqin ki, onları da bu gün, ya sabah təhvil verəcəyik. Partiyamızın da üzvləri bu prosesə qoşulublar. Hesab edirəm, hamı - Türkiyənin Azərbaycan qarşısında etdiklərinin dəyərini bilən, qardaşlıq duyğusu daşıyan hər kəs bu məsələdə öz dəstəyini verməlidir. Çünki orada insanlar çox ağır, sıxıntılı vəziyyətdədirlər. Qardaş-bacılarımız böyük bir fəlakət yaşayıblar. Bu dərdin azalmasına, kədərin yüngülləşməsinə mütləq hamımız öz töhfəmizi verməli, əlimizdən gələn kiçik nəsə olsa da, etməliyik”.

Milli Məclisin deputatı Elşad Mirbəşiroğlu da məbləğ açıqlamaq istəməyib:

“Qardaş Türkiyəyə hər bir Azərbaycan vətəndaşı yardım etmək arzusundadır. Nə qədər yardım etdiyimin ictimailəşdirilməsini istəmirəm. Bu, mənim xarakterimə uyğun deyil. Belə bir söz var: “sağ əlin verdiyini sol əl bilməz”. Hər bir Azərbaycan vətəndaşı yardım edir və edəcək. Məncə, burada heç bir istisna olmayacaq”.

Tarix: 9-02-2023, 09:36 Oxunub: 23