Novruz bayramı hər il ölkəmizdə kütləvi şəkildə keçirilir

Novruz yeni gün deməkdir. Yeni günə, yeni ilə başlamağın yolu dörd ünsürdən, dörd bayram çərşənbəsindən keçir. Su paklaşdırır, duruldur, od təbiəti və qəlbimizi isidir, yel dərd-sərimizi aparır, torpaq isə canlandırır.
      Novruz Azərbaycan xalqının tarixini, onun zəngin folklorunu “papaq atmaq”, “qulaq falı”,  “tonqaldan tullanmaq”, “səməni əkmək”, “yumurta döyüşdürmək” və s. kimi adətləri  ilə özündə əks etdirir.
     Novruz həmçinin sülhü, tolerantlığı tərənnüm edir. Ulu Öndər Heydər Əliyev: “Novruz bayramının bizə bəxş etdiyi ən gözəl nemət ondan ibarətdir ki, qədim zamanlardan bu bayramda insanlar kin-küdurəti unudur, küsülülər barışır, ziddiyyətlər aradan götürülür. Demək, bu, dostluq, həmrəylik, yüksək mənəviyyat bayramıdır.”
       Novruz bayramı  hər il  ölkəmizdə kütləvi şəkildə keçirilir. Bayramı əsas iki obraz- qışı təmsil edən Kosa və yazı simvolizə edən Keçəl  olmadan təsəvvür etmək mümkün deyil. Bakıda əsas bayram tədbirləri əfsanəvi Qız qalasının ətrafında keçirilir. Həmin gün nəhəng qalanın yüksəkliyini nəhəng səməni bəzəyir, gözəl Bahar qızı Qız qalasında təbiətin oyanmasını, həyatı simvolizə edən məşəli yandırır.
         Novruz təkcə onu keçirən türk xalqlarının deyil, ümumilikdə bəşəriyyətin mənəvi dəyəri hesab edilir.
      Bu bayramı ona görə xoş niyyətli adlandırıram ki, Prezident İlham Əliyev   Novruz bayramı ərəfəsində imzaladığı əfv sərəncamı ilə yüzlərlə ailəyə sevinc bəxş edir.
      1998-cildə çıxışlarının birində Ulu Öndər demişdir: “ Gün o gün olacaq ki, Novruz bayramını bir dəfə Şuşada, o biri il Laçında, o biri il Kəlbəcərdə, Ağdamda, Füzulidə, Cəbrayılda, Zəngilanda, Qubadlıda keçirəcəyik. Əminəm ki, belə də olacaqdır. Mən buna inanıram və bu inamla yaşayıram, bu inamla işləyirəm və bu inamla da Azərbaycan xalqına rəhbərlik edirəm.”
      Və o gün gəldi. Novruz bayramını bir gün Qarabağda qeyd edәcәklәrini illәrdir söylәdiyini xatırladan İlham Әliyev deyib: “Hәmin gün gәldi. Bu gün Novruz bayramını ölkәmizin mәdәniyyәt paytaxtı olan Şuşada qeyd edirik. Bu tarixi hadisәdir. Bu, böyük xoşbәxtlikdir. Allah Azәrbaycan xalqının dualarını eşitdi. Biz Şuşa vә azad edilmiş bütün torpaqları bərpa edəcəyik.”
Sonda  fikirlərimi birinci vitse-prezident Mehriban xanım  Əliyevanın arzuları ilə yekunlaşdırmaq istərdim. “Qoy təbiətin oyanması və yeniləşməsinin rəmzi olan bu bayram ürəklərdə ancaq saf niyyətlər, xoş duyğular oyatsın, hər evə, hər ocağa səadət və sağlıq, ölkəmizə sülh, əmin-amanlıq və uğurlar gətirsin!”
Sabunçu qəsəbəsi, 311 saylı tam orta məktəbin
Azərbaycan dili və ədəbiyyat müəllimi Əfsanə Məmmədova

Tarix: 17-03-2023, 15:54 Oxunub: 139