21 Gündür Bitməyən Xalça Qalmaqalı – Müştəriyə Kobud Münasibət, Səhv Xidmət və Laqeydlik

2026-cı il iyulun 6-da qızımın evində istifadə olunan 3 ədəd xalçanı yuyulması üçün İlknur Xalçayuma şirkətinə təhvil vermişəm. Qızım yeni ailə qurub, evdə uşaq yoxdur. Həm qızım, həm də həyat yoldaşı səhər işə gedib, axşam evə qayıdan insanlardır. Buna görə də xalçaların həddindən artıq çirkli olması barədə deyilənlər həqiqəti əks etdirmir.
Bir həftə sonra xalçalar geri qaytarıldı. Həmin vaxt xalçaları şəxsən özüm qəbul etmişəm. İlk baxışdan gördüm ki, gətirilən xalçalardan biri bizim xalça deyil. Bahalı xalçamızın yerinə köhnə türk xalçası gətirilmişdi. Bundan əlavə, xalçaların vəziyyəti də təmiz deyildi. Şirkət əməkdaşları səhvlərini qəbul edib üzr istədilər və xalçanı dəyişəcəklərini bildirərək geri apardılar.
İki gün sonra xalçalar yenidən gətirildi. Təəssüf ki, bu dəfə də eyni problemlə qarşılaşdıq. Yenə xalçalardan biri səhv idi, üstəlik təmizlənmiş kimi təqdim olunan xalçalar çirkli vəziyyətdə idi. Qızım bu səbəbdən xalçaları qəbul etmədi və geri qaytardı.
Bu gün isə artıq dördüncü dəfə xalçaları gətirdilər. Qızım işdə olduğuna görə xalçaları yenə mən qəbul etdim. Açıb baxdıqda məlum oldu ki, vəziyyət əvvəlkindən də pisdir. Üç xalçadan biri yenə başqasına məxsus xalçadır, bir xalça çox bərbad və çirkli vəziyyətdədir, üçüncü xalça isə ümumiyyətlə gətirilməyib.
Şirkətə bunun səbəbini soruşduqda isə məsuliyyəti öz üzərlərinə götürmək əvəzinə, "Görün xalça nə qədər çirkli olub ki, yuyulsa da belə qalıb" kimi cavab verdilər. Bu yanaşma tamamilə məntiqsizdir. Əgər xalça çirkli olmasaydı, onu yuyulmağa niyə verərdik? Digər tərəfdən, evdə uşaq olmayan, günün böyük hissəsini işdə keçirən iki nəfərin istifadə etdiyi xalçanın yerinə ağ rəngli xalçanı demək olar ki, qapqara vəziyyətdə geri qaytarmaq qəbulolunmazdır.
Bununla yanaşı, şirkət əməkdaşlarının müştəri ilə kobud danışması da narazılığımızı daha da artırdı. Hətta işçi telefonla rəhbəri ilə danışarkən elə bildi ki, mən eşitmirəm. Rəhbərin telefonda "Həsən, dur çıx gəl, fikir vermə müştəriyə, sabah gətirərsən" dediyini öz qulağımla eşitdim. Bu ifadə şirkətin müştəriyə qarşı nə qədər laqeyd yanaşdığını açıq şəkildə göstərir.
Artıq 21 gündür ki, bu məsələ davam edir. Nə düzgün xidmət göstərilir, nə də problemin həlli üçün ciddi addım atılır. Bu müddət ərzində qızım da, mən də yalnız əsəb və vaxt itkisi yaşamışıq.
Şirkət nümayəndələrinə bildirdim ki, məsələ ilə bağlı polisə və Vergi Xidmətinə də müraciət edəcəyəm. Buna cavab olaraq "Vermə" demələri məndə əlavə suallar yaratdı. Şirkətin bütün fəaliyyətinin qanunvericiliyə uyğun olub-olmaması aidiyyəti dövlət qurumları tərəfindən araşdırılmalıdır. Bu barədə hər hansı fakt təqdim etmirəm, lakin yaranmış şübhələrin araşdırılmasını zəruri hesab edirəm.
Ümid edirəm ki, aidiyyəti qurumlar bu məsələni obyektiv araşdıracaq, şirkətin fəaliyyətinə hüquqi qiymət veriləcək və istehlakçı hüquqlarının qorunması üçün müvafiq tədbirlər görüləcək. Çünki heç bir müştəri günlərlə davam edən belə məsuliyyətsizlik, laqeyd münasibət və keyfiyyətsiz xidmətlə üzləşməməlidir.

Tarix: Dünən, 14:03 Oxunub: 35