“Epşteyn faylları”nda Vladimir Jirinovski: rus ultramillətçisinin adı pedofil qalmaqalının kölgəsində

ABŞ Ədliyyə Nazirliyinin açıqladığı və artıq qlobal rezonans doğuran yeni “Epşteyn faylları” dünya siyasətində tanınmış bir sıra fiqurların adlarını yenidən gündəmə gətirib.

Musavat.com xəbər verir ki, açıqlanan sənədlərdə Rusiyanın ultramillətçi siyasətçisi, LDPR-in lideri (artıq ölüb) Vladimir Jirinovskinin adı da yer alır və bu fakt təkcə hüquqi deyil, həm də ciddi siyasi-mənəvi müzakirələr doğurur.

Sənədlərə əsasən, maliyyəçi-pedofil Ceffri Epşteynin saxladığı materiallarda Jirinovski ilə bağlı qeydlər mövcuddur. Həmin materiallarda rus siyasətçisi son dərəcə ağır və ifşaedici ifadələrlə təsvir olunur. Epşteynin çevrəsinə daxil olan analitik yazışmalarda Jirinovski “kloun-millətçi” kimi təqdim edilir və onun azyaşlı oğlanlara qarşı qeyri-etik davranışlara meylli olduğu iddia olunur. Bu qeydlər, Epşteynin şəxsi arxivində saxladığı materiallar arasında yer alıb və artıq ABŞ məhkəmə sənədlərinin bir hissəsi kimi ictimaiyyətə açılıb.

Məlumata görə, Jirinovskinin adı fayllarda bir neçə dəfə keçir. Bu, təsadüfi bir istinad deyil. Sənədlərdə onun Rusiya siyasətindəki rolu, aqressiv ritorikası, populist çıxışları və şəxsi davranışları ilə bağlı qeydlər yer alır. Xüsusilə də Epşteyn işi çərçivəsində aparılan araşdırmalarda, beynəlxalq səviyyədə tanınmış, qalmaqallı və kompromatla assosiasiya olunan fiqurların ayrıca “portret”lərinin hazırlandığı bildirilir. Jirinovski də həmin siyahıda yer alan adlardan biridir.

Bu ifşalar Jirinovskinin illər boyu formalaşdırdığı “siyasi şoumen”, “təxribatçı tribun” imicinə tamam fərqli, daha qaranlıq bir çalar əlavə edir. Xatırladaq ki, Jirinovski sağlığında dəfələrlə kobud, etik çərçivələri aşan çıxışları, qadınlara və azlıqlara qarşı təhqiramiz davranışları ilə gündəmə gəlmişdi. İndi isə onun adı dünyanın ən böyük pedofiliya və istismar qalmaqallarından biri olan Epşteyn işi ilə yanaşı çəkilir.

Epşteyn işi: qalmaqalın yeni mərhələsi

Son açıqlanan sənədlər Epşteyn qalmaqalının hələ də bitmədiyini göstərir. ABŞ Ədliyyə Nazirliyi tərəfindən yayımlanan milyonlarla səhifəlik materialda Epşteynin əlaqələri, yazışmaları, qeydləri və müxtəlif ölkələrdən nüfuzlu şəxslərlə bağlı topladığı məlumatlar yer alır. Bu fayllar arasında siyasətçilər, iş adamları, media nümayəndələri və müxtəlif təsir qruplarına daxil olan şəxslər haqqında kompromat xarakterli materiallar mövcuddur.

Yeni mərhələdə əsas diqqət çəkən məqamlardan biri də odur ki, sənədlər təkcə ABŞ daxilində deyil, beynəlxalq miqyasda tanınmış şəxsləri də əhatə edir. Bu isə Epşteyn şəbəkəsinin qlobal xarakter daşıdığını bir daha təsdiqləyir. Bir çox ekspertlərin fikrincə, yayımlanan materiallar hələ son deyil və növbəti mərhələlərdə daha sarsıdıcı adlar da üzə çıxa bilər.

Qlobal rezonans və siyasi kölgə

Jirinovskinin adının bu kontekstdə hallanması Rusiyanın siyasi keçmişinə də yeni baxış formalaşdırır. Kremlə yaxınlığı, sistem daxilində “idarə olunan radikal” rolunu oynaması ilə tanınan Jirinovski uzun illər Rusiyada ictimai rəyin manipulyasiyasında mühüm fiqur olub. İndi isə onun adı təkcə siyasi populizm yox, həm də ağır mənəvi və etik iddialarla yanaşı çəkilir.

Bu fakt bir daha göstərir ki, Epşteyn işi sadəcə fərdi bir cinayət dosyesi deyil. Bu, qlobal elitaların qaranlıq əlaqələrini, toxunulmaz sayılan fiqurların gizli tərəflərini üzə çıxaran nəhəng bir ifşa mexanizmidir. Jirinovski ilə bağlı ortaya çıxan məqamlar da bu zəncirin Rusiyaya uzanan halqalarından biri kimi qiymətləndirilir.

Tarix: 4-02-2026, 15:30 Oxunub: 37