Hədəf bəllidir: Azərbaycan yeni antiterror əməliyyatına başlayır? - GƏLİŞMƏ

"Ermənistan Xarici İşlər Nazirliyinin (XİN) Laçın yolunda etirazlar ilə əlaqədar 3 yanvar 2023-cü il tarixli növbəti bəyanatı tamamilə əsassızdır və beynəlxalq tərəfdaşlar arasında məsələ ilə bağlı çaşqınlıq yaratmaq və vəziyyəti süni gərginləşdirmək məqsədi daşıyır".

Bu barədə Azərbaycan XİN-dən bildirilib.

Qeyd olunub ki, Ermənistanın ərazilərimizin 30 il işğalı dövründə təbii sərvətlərimizin talanması faktına qarşı Azərbaycanın bir qrup vətəndaş cəmiyyəti nümayəndəsinin etirazları ilə əlaqədar Ermənistan XİN-in təhrif dolu bəyanat verməsi təəccüblü deyil.

Görünür ki, Ermənistan tərəfi hələ də Azərbaycan ərazisində qeyri-qanuni iqtisadi və digər fəaliyyətlərin davam etməsində maraqlıdır.

Bildirilib ki, Azərbaycan bir daha Ermənistanı beynəlxalq hüquqdan və üçtərəfli Bəyanatdan irəli gələn öhdəliklərinə əməl etməyə, Azərbaycanın suverenliyinə və ərazi bütövlüyünə qarşı yönəlmiş fəaliyyətlərdən çəkinməyə, təcavüzkar siyasi və hərbi təxribatlarını dayandırmağa çağırır.

Azərbaycanın regional sülh, sabitlik və inkişaf ilə bağlı mövqeyi prinsipial və ardıcıldır, beynəlxalq hüquqa və formalaşmış beynəlxalq təcrübəyə əsaslanan tədbirlər davam etdiriləcək.

Həmçinin, müdafiə naziri general-polkovnik Zakir Həsənov və nazirliyin digər rəhbər heyəti Quru Qoşunlarının səfərbərlik təminat bazasında olub.

Müdafiə naziri bazanın silahlanmasında olan artilleriya vasitələrinə, döyüş və avtomobil texnikasına baxış keçirib, onların texniki vəziyyəti ilə maraqlanıb və heyətlərinin hazırlıq səviyyəsini yoxlayıb.

Silahlanmada olan silah və döyüş texnikasına təhlükəsizlik qaydalarına əməl edilməklə vaxtında texniki xidmətin göstərilməsi ilə bağlı müvafiq göstərişlər verilib.

Bütün bu addımlar və açıqlamalar bəzi ekspertlər tərəfindən müharibəyə hazırlıq kimi qiymətləndirilir.

Cebhe.info-ya açıqlama verən politoloq Şəbnəm Həsənova bildirib ki, regionumuzla bağlı baş verən siyasi, iqtisadi və hərbi məsələlər Ermənistanın boyunu aşır:

"Artıq bu amil heç zaman olmadığı qədər daha qabarıq formada özünü göstərir. Hadisələrin inkişaf tendensiyası Azərbaycanın əldə etdiyi Zəfər sonrası yaratmış olduğu reallıqlar beynəlxalq aktorlardan asılıdır.

Məsələn, bu yaxınlarda nüfuzlu “Foreign Policy” jurnalının eskpertləri tərəfindən dərc olunan məqalədə belə, Azərbaycanı hədəf alan məsələ yoxdur, nəşr daha çox Rusiyanı hədəf alaraq onun üzərinən ağır siyasi-hüquqi məsuliyyət qoyur.

Qeyd edim ki, nüfuzlu analitik təşkilat olan Beynəlxalq Böhran Qrupunun hesablamasına görə, 2023-cü ildə Azərbaycan-Ermənistan münasibətləri qarşıdurmaya doğru sürüklənəcək. “Beyin mərkəzi” proqnozlaşdırır ki, hazırda qüvvələr nisbəti Azərbaycanın xeyrinədir. Bu gün dünyada mövcud geosiyasi vəziyyəti nəzərə alsaq, görərik ki, Azərbaycan qazı Avropa üçün daha böyük önəm kəsb edir. Məhz bu səbəbdən də Avropa Azərbaycanı öz məqsədlərinə çatmaqda mane olmayacaq".

Politoloq bölgədə yeni antiterror əməliyyatının keçiriləcəyini də istisna etməyib:

"Ermənistan sadəcə güc dilindən anlayır. Deməli, sərhəddə yeni əməliyyatların olacağı istisna deyil. Məhz Azərbaycan Respublikasının Prezidenti cənab İlham Əliyev Bakıda keçirilən "Orta Dəhliz boyunca: geopolitika, təhlükəsizlik və iqtisadiyyat” mövzusunda beynəlxalq konfransda da bəyan etdi ki, Ermənistan və İran Zəngəzur dəhlizini əngəlləmək iqtidarında deyil. Eyni zamanda Prezident İlham Əliyev Dünya Azərbaycanlılarının Həmrəyliyi Günü və Yeni il münasibətilə xalqa təbrik mesajında da Zəngəzur dəhlizinin mütləq açılacağını bildirdi".

Tarix: 5-01-2023, 14:22 Oxunub: 60