Əgər Fransa ilə Ermənistan Azərbaycanla DİL TAPMAZSA... - ŞƏRH

2020-ci il 27 sentyabr tarixində Azərbaycan Ermənistanın növbəti təxribatlarının qarşısını qətiyətlə almaqla bərabər torpaqlarımızın işğaldan azad olunması əməliyyatlarına da başladı. Cəmi 44 gün çəkən Vətən müharibəsi nəticəsində torpaqlarımız işğaldan azad edildi. Noyabr ayının 8-də Qarabağın incisi Şuşanın işğaldan azad olunması, Azərbaycan tarixinin ən şərəfli və zəfər gününü formalaşdırdı. Həqiqətən də bu, Azərbaycan dövlətçiliyi və Azərbaycan xalqının həyatında çox mühüm əlamətdar bir hadisədir.
Bu barədə Bizimyol.info xəbər portalına Milli Məclisin deputatı Elşad Mirbəşiroğlu danışıb. O, qeyd edib ki, 30 il müddətində torpaqlarımız Ermənistanın işğalı altında olanda Azərbaycan münaqişəni dinc vasitələrlə tənzimləməyə çalışırdı. Bu zaman Azərbaycanın başlıca məqsədi ondan ibarət idi ki, regionda geniş miqyaslı müharibə baş verməsin, itkilər olmasın və beynəlxalq hüquq çərçivəsində münaqişə ədalətli şəkildə, yəni Azərbaycanın ərazi bütövlüyü çərçivəsində öz həllini tapsın.

“Bununla bərabər Azərbaycan bəyan edirdi, Azərbaycan prezidenti cənab İlham Əliyev hər zaman vurğulayırdı ki, biz öz torpaqlarımızı hərbi yolla işğaldan azad etmək gücünə sahibik. Mənasız danışıqları da sonsuzluğa qədər davam etdirməyəcəyik. Lakin Ermənistan və onun himayədarları xüsusilə, Fransanın simasında Azərbaycanın sərgilədiyi mövqeyi lazımınca qiymətləndirməyi bacarmadılar. Ölkəmizə qarşı təxribatlarını daha da intevsivləşdirdilər. Hətta yeni ərazilərimizi işğal etmək istəklərini çəkinmədən nümayiş etdirirdilər. Təbii ki, biz artıq hərbi yolla torpaqlarımızın işğaldan azad olunmasının zəruriliyini gördük və hərəkətə keçdik. Azərbaycan prezidenti, müzəffər ali baş komandan cənab İlham Əliyevin rəhbərliyi altında Azərbaycan ordusu tariximizin qızıl səhifəsini yaratdı. Və bu günki tariximizdən dünənimizə boylananda nə qədər böyük və qətiyyətli bir yol keçdiyimizi bir daha görməkdəyik”-deyə deputat bildirib.

Elşad Mirbəşiroğlu vurğulayıb ki, bir daha bu günün 8 noyabr Zəfər gününün əhəmiyyətini və qürurunu dərk edir, hiss edirik.

Deputat qeyd edib ki, Azərbaycan 44-günlük Vətən müharibəsi dövründə hər tərəfli potensiala sahib olduğunu bütün dünyaya nümayiş etdirdi. Azərbaycanın siyasi, diplomatik, iqtisadi, hərbi potensialı və imkanları olduqca ahəngdar bir şəkildə Ermənistanın işğalçılıq siyasətinin aradan qaldırılması üçün öz təsirini göstərdi.

Deputatın sözlərinə görə, 44 günlük Vətən müharibəsi dövründə ölkəmizə əsassız siyasi hücumlar da edilirdi. Ölkə prezidenti bunun da qarşısını alırdı. O, dünyanın 30-dan çox, ən nüfuzlu kütləvi informasiya vasitələrinə müxtəlif dillərdə müsahibələri ilə bu hücumların qarşısını alırdı. Haqlı mövqelərimizi əsaslandırır, əsassız hücumları təşkil edən dairələri qətiyətlə susdururdu. Bunun özü də hərbi qələbəmizlə yanaşı, siyasi və diplomatik qələbəmizi şərtləndirirdi.

“2020-ci il noyabr ayının 10-da birgə bəyanat Ermənistanın kapitulyasiya sənədi oldu. Həmin bəyanatda Azərbaycanın haqlı mövqeləri öz ifadəsini tapmış oldu. Azərbaycan prezidentinin qətiyyəti və təşəbbüsləri sənəddə ifadə olundu. Torpaqlarımız işğaldan azad edildikdən sonra ötən 3 il ərzində biz bütün ərazilərimiz boyunca suverenliyimizin etibarlı və dönməz şəkildə təmin olunması istiqamətində hər tərəfli addımlar atdıq”-deyən deputat vurğulayıb ki, bunun özü də ayrıca bir strategiya kimi qiymətləndirilə bilər.

Deputat hesab edir ki, bütün ərazilərimiz boyunca suverenliyimizin təmin olunması strategiyası özündə siyasi, diplomatik, hərbi, iqtisadi komponentləri birləşdirirdi. Azərbaycan bu komponentlərin hər birini uğurla tətbiq edərək, bayrağımızı Xankəndində və Xocalıda ucaltdı.

Tarix: 4-11-2023, 09:10 Oxunub: 19