Paşinyanın Qarabağ meymunluğu NƏ VAXT BİTƏCƏK? - HƏQİQƏTƏN DƏ...

Son 30 ildə Ermənistan tərəfindən Qarabağ və Şərqi Zəngəzur iqtisadi rayonlarını işğal altında saxlanılmaqla yanaşı Azərbaycan vətəndaşlarına zərər vermək məqsədi ilə həmin ərazilərdə minalar basdırılıb. Belə ki, 32 il ərzində 3360 nəfər Azərbaycan vətəndaşı mina terrorunun qurbanı olub. Onlardan 294 nəfəri isə, müharibə bitdikdən sonra mina qurbanına çevrilib. Azərbaycanın səylərinə baxmayaraq, Ermənistan mina xəritələrini Azərbaycana təqdim etmir. Təqdim edilən xəritələrdə isə, 25 faiz belə doğruluq payı yoxdur…
“2020-ci ildən ötən zaman ərzində Ermənistan müxtəlif xarakterli təxribatlarını davam etdirməkdədir. Belə ki, Azərbaycanın irəli sürdüyü sülh şərtləri Ermənistan tərəfindən qəbul olunsa da, Ermənistan hər vasitə ilə Azərbaycanla yekun sülh sazişini imzalamaqdan yayınmaqdadır. Və həm hərbi təxribatlarını, həm siyasi təxribatlarını davam etdirməklə yanaşı eyni zamanda mina terrorunu da davam etdirməkdədir”.

Bu barədə Bizimyol.info xəbər portalına Milli Məclisin deputatı Elşad Mirbəşiroğlu danışıb. O, qeyd edib ki, hazırda beynəlxalq səviyyədə mina təhlükəsizliyinin təmin olunması prioritet məsələlərdən biridir. BMT mina terrorunun qarşısının alınmasını özünün kompleks fəaliyyət istiqamətlərindən biri kimi müəyyənləşdirmişdir. Belə bir yanaşmanın mövcud olunmasına baxmayaraq, Ermənistan yenə də özünü tam cəzasızlaşma şəraitində hiss edərək, Azərbaycan qarşı mina terrorunu davam etdirməkdədir.

“Ermənistan Azərbaycandan vaxtilə bir neçə dəfə humanitar vaxt xahiş edib. Kəlbəcərin boşaldılması ilə bağlı Azərbaycanın vermiş olduğu əlavə vaxtdan ermənilər ərazilərimizə minaların basdırılması üçün istifadə ediblər. Eləcə də Ermənistan istehsalı olan yeni istehsal tarixli minalar ərazilərimizə basdırılıb. Bütün bunların başlıca səbəbi Ermənistanın özünün tam cəzasızlaşma şəraitində hiss etməsidir.

Beynəlxalq instansiyalar mina terroruna qarşı mübarizədə də qeyri-səmimi davrandıqlarını nümayiş etdirməkdə, ikili standartlar tədbiq etməkdədirlər. Ermənistan bütün dünyanın gözü qarşısında Azərbaycana qarşı mina terrorunu davam etdirir, lakin bununla bağlı Ermənistana ən azından irad belə tutulmur”-deyən Elşad Mirbəşiroğlu hesab edir ki, Ermənistanın mina terrorunun qarşısının alınmasında yenə də Azərbaycanın iradəsi keçərli olacaq.

Deputatın fikrincə, Azərbaycan nə qədər çalışsa da, beynəlxalq hüquq üzərindən heç bir məsələnin həlli mümkün olmayıb.

“Azərbaycan 30 il ərzində beynəlxalq hüquq normaları əsasında keçmiş Ermənistan-Azərbaycan münaqişəsini dinc vasitələrlə tənzimləməyə çalışdı. Bu istiqamətdə hər zaman səmimiyyətlə praktiki addımlar atmaq istədiyini nümayiş etdirdi. Lakin Ermənistan kənar dəstəklər almaqla hər zaman danışıqların imitasiyası ilə məşğul oldu. Münaqişənin dinc vasitələrlə həlli istiqamətində heç bir addım atmadı. Əksinə münaqişə vəziyyətində qalması üçün əlindən gələni etdi. Belə olan halda isə, Azərbaycan öz gücüylə məsələni həll etdi. Torpaqlar erməni işğalından azad edildi”-deyən deputat qeyd edib ki, Azərbaycan yenə də, konstruktiv yollar təklif etməkdədir. Ermənistan isə, buna cavab olaraq, Azərbaycana qarşı müxtəlif xarakterli təxribatlarını həmçinin mina terrorunu davam etdirməkdədir.

Elşad Mirbəşiroğlu hesab edir ki, belə davam edərsə, beynəlxalq hüquq və instansiyalar gücsüz olacaqlarsa və yaxud beynəlxalq instansiyalar aşkar fəaliyyətsizlik nümayiş etdirərlərsə, Azərbaycan yenə də təhlükəsizliyinə mövcud olan istənilən təhdidi öz gücüylə aradan qaldıracaq. Eyni zamanda Ermənistanın təxribatlarını və mina terrorunn qarşısını da özü öz iradəsi və gücü sayəsində aradan qaldıra biləcək.

Tarix: 27-04-2023, 14:22 Oxunub: 21