Yeni imkanlar və perspektivlər

Son illərdə Azərbaycan Mərkəzi Asiya ölkələri ilə əlaqələrin inkişafının yeni mərhələsinə qədəm qoyub. Ölkəmizin dünyada artan nüfuzu sayəsində bir çox dövlətlər Azərbaycanla əməkdaşlığa can atır və onların arasında Mərkəzi Asiya dövlətləri önəmli yer tutur. Son bir il ərzində Azərbaycan Prezidentinin Mərkəzi Asiya ölkələrinə ardıcıl səfərləri xüsusilə diqqət çəkir. Bu münasibətlərin inkişaf etməsi isə təkcə Azərbaycan və Mərkəzi Asiya ölkələri üçün deyil, həm də bütün Türk dünyası üçün mühüm əhəmiyyət daşıyır. İstər regionda, istərsə də dünyada baş verən geosiyasi proseslər dövlətləri birgə əməkdaşlığa səsləyir. Qarşılıqlı səfərlər zamanı imzalanan sənədlər ölkələrimiz arasında münasibətlərin perspektivlərini müəyyənləşdirir.
Cənab Prezident İlham Əliyevin artan siyasi nüfuzunun göstəricisi kimi göstərmək olar ki, indi bütün qlobal və əhəmiyyətli görüşlərdə, sammitlərdə ölkəmiz ali rəhbərin şəxsində təmsil olunur. Yürüdülən xarici siyasətin məntiqi nəticəsi olan bu gəlişmə ölkəmizin nüfuzunun yüksəlişindən xəbər verir ki, bu da cənab prezidentin birbaşa xidmətidir.
Cari ilin 14 sentyabr tarixində Düşənbədə Mərkəzi Asiya Dövlət Başçılarının 5-ci Məşvərət görüşünə regiondankənar ölkə başçısı kimi cənab ilham əliyevin dəvət edilməsi bunun bariz nümunəsidir.
Cənab Prezident Məşvərət görüşündə çıxış edərək bildirmişdir ki, Azərbaycan Mərkəzi Asiya ölkələri ilə əməkldaşlığa böyük üstünlük verir və bu əməkdaşlığın bütün sahələrdə davamlı inkişafını görmək istəyir. Ortaq mədəni tarixə malik xalqlarımızın dostluq və qardaşlıq ənənələrini yaşatmaq, inkişaf etdirmək zəruridir və bu sahədə mühüm addımların atılması sevindiricidir. Regionun hər bir ölkəsi ilə ayrıca sazişlərin, əməkdaşlığın olmasını qeyd edən ölkə başçısı Mərkəzi asiyanı Avropa ilə birləşdirən nəqliyyat dəhlizinin Azərbaycan olduğunu bildirərək söyləmişdir ki, bu yllar və imkanlar qardaş ölkələr üçün həmişə açıqdır və lazımi dəstək verməyə hazırıq: “Nəqliyyat və logistika sahəsi münasibətlərimizdə mühüm yer tutur. Azərbaycan Mərkəzi Asiya ölkələri üçün Türkiyə və Avropa bazarları istiqamətində etibarlı tranzit ölkəsidir. Əks istiqamətdə tranzitin əhəmiyyəti də az deyil. Mərkəzi Asiyadakı qardaşlarımız bilirlər ki, Azərbaycanın bütün nəqliyyat–logistika infrastrukturu onlar üçün açıqdır.”
Cənab Prezident səmərəli əməkdaşlığın siyasi göstəricilərinin mövcudluğunu qeyd edərək bildirmişdir: “Otuz ildən artıqdır ki, biz müstəqil dövlətlər kimi həm ikitərəfli, həm çoxtərəfli formatda fəal şəkildə qarşılıqlı fəaliyyət aparırıq, bir-birimizin müstəqilliyini, suverenliyini və ərazi bütövlüyünü dəstəkləyirik, iqtisadi əlaqələri fəal şəkildə inkişaf etdiririk”.
Dövlət başçısı ölkələrimiz arasında əməkdaşlığın yeni sahəsinin fiber-optik infrastrukturun yaradılmasına yönəlmiş “Rəqəmsal İpək Yolu” layihəsinin olduğunu söyləyib və bu layihənin gələcəkdə geniş imkanlar yaradacağını bildirib.
İkitərəfli əməkdaşlığın mühüm meyarlarından birinin qarşılıqlı ticarətin və sərmayələrin artımı olduğunu söyləyən dövlətimizin başçısı həmin iki istiqamət üzrə göstəricilərin davamlı artdığını söyləyərək bildirmişdir: “İkitərəfli əməkdaşlığın mühüm meyarlarından biri qarşılıqlı ticarətin və sərmayələrin artımıdır. Sevindirici haldır ki, həmin iki istiqamət üzrə göstəricilər davamlı artıma malikdir. Keçən il Azərbaycanın Mərkəzi Asiya ölkələri ilə ticarət dövriyyəsi 3 dəfədən çox, bu ilin 7 ayı ərzində isə daha 50 faiz artıb.
Birgə sərmayə fondları yaradılıb, növbəti 3 il üzrə 1 milyard dollardan artıq qarşılıqlı sərmayələrin həcmi razılaşdırılıb. Biz artıq sənaye əməkdaşlığı, maşınqayırma, avtomobil sənayesi, gəmiqayırma, kənd təsərrüfatı, xüsusən də pambıqçılıq, ipəkçilik, bağçılıq və heyvandarlıq sahələrində çoxsaylı layihələri həyata keçiririk. Mehmanxana işi və turizm sahəsindəki sərmayə layihələri ilk icra mərhələsindədir. Biz Mərkəzi Asiyadan olan şirkətlərin bu yaxınlarda Azərbaycanda yaradılmış Ələt Azad İqtisadi Zonasına marağını görürük.”
Hazırkı əlaqələrin səviyyəsi göstərir ki, Azərbaycan Mərkəzi Asiya ölkələri üçün mühüm tranzit ölkə və etibarlı tərəfdaşdır. Bütün bunlar da Azərbaycan ilə Mərkəzi Asiya ölkələri arasında qurulan əlaqələrin böyük perspektivə malik olduğunu göstərir.

Rüstəm Nağıyev,
YAP Gədəbəy rayon təşkilatının sədri

Tarix: 18-09-2023, 10:38 Oxunub: 139