Həqiqət Qədimova: Bölgənin yeni elmi-mədəni mərkəzi

UNEC-in Zaqatala filialının direktor müavini dosent Həqiqət Qədimova - Prezident İlham Əliyevin Xankəndi şəhərində Qarabağ Universitetinin yaradılması ilə bağlı 28 noyabr 2023-cü il tarixli Sərəncamı Azərbaycanın təhsil tarixində yeni bir səhifə açdı. Bütünlükdə, 30 il işğalda olan tarixi torpaqlarımızda belə bir ali təhsil ocağının yaradılması Azərbaycan xalqının arzusu idi. Qarabağ Universitetinin məhz Xankəndidə yaradılması dövlət təhsil siyasəti qarşısında yeni üfüqlər açacaq.

Sentyabrın 20-də Qarabağ Universitetinin açılışı olub və Prezident İlham Əliyev mərasimdə müəllim və tələbə heyəti ilə görüşdə proqram xarakterli çıxış edib. Həmin çıxışda qarşıya strateji hədəflər qoyulub. Yeni dövrün tələblərinə uyğun qurulan bu universitet qarşıdakı dönəmdə ən müasir standartlara cavab verəcək. Hədəf odur ki, Qarabağ Universiteti həm yüksək səviyyəli mütəxəssislər hazırlasın, həm də dövlətimizə və xalqımıza layiqli vətəndaşlar yetişdirsin.

Prezident İlham Əliyev görüşdə Azərbaycan hərbçilərinin qəhrəmanlığından, peşəkarlığından danışıb. Universitet üçün gözəl yataqxana yaradıldığını, növbəti üç ildə yeni tədris korpusları inşa ediləcəyini söyləyən dövlətimizin başçısı Qarabağ Universitetinin ölkəmizin aparıcı ali məktəblərindən birinə çevriləcəyinə ümid etdiyini bildirib.

Qarabağ Universiteti, ilk növbədə işğaldan azad olunmuş ərazilərin ümummədəni, elmi və təhsil mühitinin formalaşması, intellektual səviyyənin artırılması baxımından olduqca əhəmiyyətlidir. Bu ali məktəb tədqiqat əsaslıdır. Yəni təhsil ocağında müasir metodlardan istifadə edilərək müxtəlif sahələrdə tədqiqatlar aparılacaq. Digər tərəfdən, Qarabağ Universitetinin beynəlxalq əməkdaşlığının qurulması da perspektiv hədəflər sırasındadır. Yaxın zamanda xarici ölkələrdən universitetə müəllimlər dəvət olunacaq. İlkin mərhələdə Qarabağ Universitetində kadr hazırlığı 6 fakültədə - Pedaqoji, İncəsənət, Humanitar və sosial elmlər, İqtisadiyyat, Mühəndislik və Turizm fakültələrində aparılır.

Universitet hazırda 3 tədris binasında yerləşir. Əsas tədris binasında Pedaqoji, Mühəndislik, Humanitar və sosial elmlər, İqtisadiyyat və Turizm fakültələri, 2-ci tədris binasında İncəsənət fakültəsi, 3-cü tədris binasında isə Beynəlxalq dil mərkəzi fəaliyyət göstərir. 2024/2025-ci tədris ili üzrə Qarabağ Universitetinə 1104 nəfər qəbul olub və qəbul planı 98,5 faiz dolub. Universitetə qəbul olan tələbələrdən 101 nəfəri 600-dən, 385 nəfəri isə 500-dən çox bal toplayıb.

Vətən müharibəsindəki parlaq qələbəmizdən dərhal sonra azad olunmuş ərazilərimizdə ən müasir standartlarla tikilən məktəblər artıq fəaliyyətdədir. Bu məktəblərdə gələcəyimizin layiqli vətəndaşları oxuyurlar. Yeni yaradılan Qarabağ Universiteti isə, şübhəsiz, regionda tarixən mövcud olmuş təhsil mühitini çox yaxın vaxtda canlandıracaqdır.

Müzəffər Ali Baş Komandan İlham Əliyevin sərkərdəlik məharəti və şanlı Azərbaycan Ordusunun sücaəti, qahrəmanlığı sayəsində Azərbaycanın haqq davası olan 44 günlük Vətən müharibəsi zamanı doğma torpaqlarımızı işğaldan azad etdi və tarixi ədalət bərpa olundu.

Qürur hissi ilə deyə bilərik ki, Vətən müharibəsi zamanı Azərbaycan xalqı öz Liderinin ətrafında sıx birləşərək bütün dünyaya öz gücünü, mətinliyini, mübarizliyini nümayiş etdirdi.

Eyni zamanda qeyd etmək lazımdır ki, 44 gün davam edən və işğal altındakı ərazilərimizin azad olunması ilə nəticələnən Vətən müharibəsi tariximizin ən parlaq səhifəsinə, Azərbaycan xalqının iftixar və qürur mənbəyinə çevrildi.

Bu müharibə xalqımızın milli həmrəyliyini, öz haqqı uğrunda mübarizə aparmaq əzmini nümayişi etdirdi. Hərbi əməliyyatlar dövlətçilik tariximizdə, eyni zamanda hər bir azərbaycanlının yaddaşında əbədi qalacaq, heç vaxt unudulmayacaq ən parlaq səhifə kimi öz əksini tapacaq. Prezident, Ali Baş Komandan İlham Əliyev şəxsi keyfiyyətləri, əzmi, qətiyyəti ilə əsrlərdir davam edən tarixi gedişatı dəyişməyi bacardı.

Vətən müharibəsindəki şanlı Zəfərimizdən sonra regionda yeni geosiyasi vəziyyət yaranıb, bu proseslər Azərbaycanın xeyrinə davam edir. Çünki bu gün Azərbaycan sözün əsl mənasında həm beynəlxalq aləmdə, həm də regionda böyün nüfuza sahib olan bir dövlətdir.

Xüsusilə qeyd etmək lazımdır ki, Prezident İlham Əliyevin Dövlət Suverenliyi Günü - 20 sentyabr 2024-cü il tarixində Xankəndi şəhərində Qarabağ Universitetinin təmirdən sonra açılışında iştirakı və bu ali təhsil ocağının müəllim heyəti və tələbələrlə görüşü zamanı səsləndirdiyi fikirlər hər birimizi bir daha qürurlandırdı. Dövlət başçısı çıxışı zamanı bildirdi ki, Qarabağ Universitetinin yaradılması tarixi hadisədir və ötən ilin noyabr ayında bununla bağlı müvafiq Sərəncam imzalandı. Elm və Təhsil Nazirliyi tezliklə bütün lazımi tədbirləri gördü. Demək olar ki, bina yenidən quruldu. Bu bina Sovet dövründə Azərbaycan memarları, inşaatçıları tərəfindən inşa edilmişdi. İşğal dövründə bunu erməniləşdirmək üçün müəyyən işlər görülmüşdü. O əlamətlər də tamamilə silindi. Binanın önü açıldı, gözəl bir park yaradıldı.

Tam əminliklə deyə bilərik ki, cənab İlham Əliyevin rəhbərliyi və yorulmaz fəaliyyəti nəticəsində ölkəmiz yeni uğurlara və qələbələrə imza atacaqdır. Bu gün Azərbaycan müstəqil siyasət yürüdür və öz milli maraqları çərçivəsində, beynəlxalq hüquq normalarına əsaslanaraq öz siyasi mövqeyini ortaya qoyur. Məhz bu siyasətin nəticəsidir ki, Azərbaycan nəinki regionda, beynəlxalq aləmdə böyük nüfuz sahibi olan bir dövlətə çevrilib.

Tarix: 25-09-2024, 13:29 Oxunub: 196