YAP-ın dövlətimizin inkişafında tarixi rolu var

Yeni Azərbaycan Partiyasının yaradılmasından 32 il ötür. Yeni Azərbaycan Partiyası Azərbaycan tarixinin son dərəcə ağır və keşməkeşli günlərində, ölkənin ciddi sınaqlara məruz qaldığı bir dövrdə Azərbaycan ziyalılarının təşəbbüsü və fəal iştirakı ilə yaranmışdır. Azərbaycanın taleyini düşünən insanlar ölkəni böhrandan çıxara biləcək yeni bir partiya yaratmaq təşəbbüsü ilə çıxış etdilər və bu məqsədlə Ulu Öndər Heydər Əliyevin ətrafında birləşdilər. Azərbaycanın ən yeni tarixinə “91-lər”in müraciəti kimi daxil olmuş sənəd əslində, bütün xalqın arzu və istəklərinin ifadəsi idi. Xalqın istəyini nəzərə alaraq Ulu Öndərə müraciət edən məşhur “91-lər”in cəsarətli addımları nəticəsində dağıdıcı proseslərin qarşısı alındı. Azərbaycanın görkəmli ziyalıları, tanınmış insanları və nüfuzlu şəxsiyyətlərinin imzaladıqları müraciətdə Ümummilli Lider Heydər Əliyevdən yeni yaradılacaq siyasi partiyaya rəhbərlik etmək xahiş olunurdu. Yeni Azərbaycan Partiyasının təsis konfransı 21 noyabr 1992-ci il tarixində Naxçıvanda ölkəmizin bütün regionlarını təmsil edən və 550 nəfərdən ibarət olan təşəbbüs qrupunun iştirakı ilə keçirilmişdir. Təsis konfransı Yeni Azərbaycan Partiyasının yaradılması haqqında qərar, partiyanın Nizamnaməsini və Proqramını qəbul etdi. Konfransda Ulu Öndər Heydər Əliyev yekdilliklə partiyanın sədri seçildi. Habelə, partiyanın Siyasi Şurası, İdarə Heyəti və sədrin müavinləri seçildi. Beləliklə, müstəqil Azərbaycanın tarixində öz üzərinə böyük tarixi missiya götürən Yeni Azərbaycan Partiyası yarandı. Ulu Öndər Heydər Əliyevin yaratdığı partiya ötən illər ərzində ölkəmizdə siyasi sabitliyin və davamlı inkişafın təminatçısı kimi çıxış etmişdir. Qısa müddət ərzində ümumxalq partiyasına çevrilmiş Yeni Azərbaycan Partiyası yarandıqdan bu günə qədər çox böyük, şərəfli və uğurlu yol keçmişdir. Yeni Azərbaycan Partiyasının 2005-ci il 26 mart tarixində keçirilmiş III qurultayında Partiyanın yeni sədri – Azərbaycan Respublikasının Prezidenti cənab İlham Əliyev seçilmişdir. Partiya məfkurəsinin əsasını təşkil edən müstəqil dövlətçilik, qanunçuluq, azərbaycançılıq, yaradıcı təkamül, vətəndaş həmrəyliyi və sosial ədalət prinsipləri YAP-ın qarşısında duran vəzifələrin həyata keçirilməsinin ideya təminatı olaraq mahiyyətcə Azərbaycanın siyasi gələcəyinin də ideya bazasını şərtləndirmiş olur. Vətənə sadiqlik və ümummilli maraqlara sədaqət partiya üzvlərini səciyyələndirən əsas göstəricilərdir. YAP Azərbaycanda demokratik, hüquqi, dünyəvi dövlət və azad vətəndaş cəmiyyəti qurmaq məqsədi ilə irqindən, etnik mənsubiyyətindən, dinindən, dilindən, cinsindən, mənşəyindən, əmlak vəziyyətindən, qulluq mövqeyindən, əqidəsindən asılı olmayaraq Azərbaycan vətəndaşlarını ümumi siyasi ideya və məqsəd ətrafında birləşdirən siyasi partiyadır. Yeni Azərbaycan Partiyası nəinki Azərbaycanın, həm də Cənubi Qafqazın ən böyük siyasi partiyasıdır. 5 mart 2021-ci ildə keçirilmiş YAP-ın VII qurultayında qəbul edilmiş qərar əsasında Yeni Azərbaycan Partiyasının yeni Nizamnaməsi, 40 nəfər tərkibdə İdarə Heyəti, 13 nəfərdən ibarət Təftiş Komissiyası və yeni qurum olaraq YAP-ın Veteranlar Şurasının 35 nəfərlik tərkibi təsdiq edilmişdir. VII qurultayda qəbul olunmuş qərarlar hakim partiyanın “iqtidar-xalq” modelinin real işə düşdüyünü, milli həmrəyliyin yeni inkişaf mərhələsinin başlandığını nümayiş etdirdi. Prezident seçkilərindən sonra ərazi bütövlüyümüzün bərpası birinci dərəcəli vəzifə kimi qarşıya məqsəd qoyuldu və bu vəzifə uğurla icra olundu. Prezident seçkilərindən sonra ölkə başçısının bəyan etdiyi proqram ardıcıllıqla icra edilir. Verdiyi vədlərə sadiq qalmış Azərbaycan iqtidarı bütün islahatları ardıclıqla icra edir. YAP öz təşəbbüsləri sayəsində partiyalararası siyasi dialoqu stimullaşdırır. Siyasi dialoqun inkişafı dövlət siyasətinin prioritet fəaliyyət istiqamətlərindən biridir. Ölkəmizdə aparılan siyasi dialoq təcrübəsi YAP-ın təşəbbüsləri ilə zənginləşir. 32 ildir inkişaf və tərəqqi ömrü yaşayan Yeni Azərbaycan Partiyası bu gün də ölkəmizdə gedən çoxşaxəli islahatlarla yeni bir tarixi mərhələyə qədəm qoyan dövlətçiliyimiz üçün yeni yaranmış reallıq kontekstindən çıxış edən böyük bir siyasi qüvvədir. Yaranmış yeni reallığı şərtləndirən başlıca amil dövlətimizin başçısının ümummili liderimiz Heydər Əliyevin ideyalarını daha da inkişaf etdirərək həyata keçirdiyi uğurlu daxili və xarici siyasət nəticəsində Azərbaycanı müstəqil dövlət kimi daha da gücləndirib, regionda aparıcı və dünya miqsyasında söz sahibi olan dövlətə çevirməklə, iqtisadi sahədə qazandığımız uğurları çox böyük məharətlə ərazi bütövlüyümüzün bərpasına yönəltməyi və 44 günlük Vətən müharibəsində əldə etdiyimiz Şanlı qələbəmiz oldu. Yeni yaranmış reallıq YAP-ın fəaliyyətinin tənzimlənməsinin çevik idarəetmə mexanizminin yaradılmasını aktual etdi. Xüsusilə Vətən müharibəsinin əvvəlində başlamış siyasi dialoq qısa müddət ərzində yaxşı nəticələr vermişdir. Özünü siyasi qurum adlandıran antimilli şura istisna olmaqla, bütün partiyalar, bütün siyasi qüvvələr dialoqa meyil göstərmiş və dialoq baş tutmuşdur. Əlbəttə, Qarabağ məsələsi, siyasi partiyaların fəaliyyəti, demokratiyanın inkişafı, iqtisadi azadlıqların bərqərar olması, ölkəmizin güclənməsi kimi ümummilli məsələlərdə heç bir fərqli fikir ola bilməz. Siyasi dialoqun davamında maraqlı olduğunu, ölkəmizin gələcək siyasi sisteminin təkmilləşməsi üçün bunun böyük əhəmiyyəti olduğunu vurğulayan dövlət başçısının partiyanın qurultayındakı proqram xarakterli çıxışı YAP-ın qarşısında sahib olduğu resurslardan, ictimai-siyasi nüfuzundan istifadə edərək, Azərbaycanın gələcəyi naminə milli birliyin əldə olunmasına xidmət edən siyasi dialoqun daha da dərinləşdirilməsini vəzifə kimi qoyur. Artıq hər kəsə məlum olduğu kimi, partiyanın VII Qurultayında 6 siyası partiyanın YAP-a qoşulması respublikada yaranmış yeni reallıq fonunda milli həmrəyliyin də yeni inkişaf mərhələsinin başlamasının bariz nümunəsidir. VII Qurultay göstərdi ki, yaradıldığı vaxtdan keçən 32 il ərzində YAP bir qayda olaraq siyasi proseslərin önündə gedib. Partiyada birinci müavin postunun təsis olunması, Respublikanın Birinci vitse-prezidenti, Heydər Əliyev Fondunun prezidenti Mehriban xanım Əliyevanın birinci müavin postuna gətirilməsi, İdarə Heyətinin genişləndirilməsi, QHT sektorunda, ictimai-siyasi və mədəni mühitdə formalaşmış yeni adların İdarə Heyətində yer alması, yeni nəsil tanınan və tanınmayan siyasətçilərin rəhbərliyə gətirilməsi, köhnə və yeni nəsil siyasətçilər arasında balansı qoruyaraq Veteranlar Şurasının yaradılması partiyanın qarşısında qoyulan məsuliyyətli vəzifələrin öhdəsindən layiqincə gələcəyini göstərir.

Rüstəm Nağıyev,
YAP Gədəbəy rayon təşkilatının sədri.

Tarix: 19-11-2024, 08:41 Oxunub: 108