Səttar Möhbalıyev: “Laçın Zirvə görüşü dostluq və qardaşlığın sarsılmaz nümunəsi kimi tarixdə qalacaq”

“Azərbaycanın Türkiyə kimi Pakistanla da əlaqələrinin dərin tarixi və mənəvi kökləri vardır. Bu üç ölkə bir-biri ilə sıx tellərlə bağlı olan dost, qardaş və müttəfiq ölkələrdir. Hər üç xalqın eyni dəyərlərə malik olması onlar arasında birlik və həmrəyliyi daha da möhkəmləndirir. Azərbaycanın ayrılıqda həm Türkiyə, həm də Pakistanla strateji əməkdaşlığı var. Məhz Pakistan və Türkiyə Azərbaycanın müstəqilliyini tanıyan ilk iki dövlətdir. Pakistanla Türkiyə Ermənistan-Azərbaycan münaqişəsinin həllində də hər zaman Azərbaycanın mövqeyindən çıxış edib, münaqişənin ölkəmizin ərazi bütövlüyü və sərhədlərin toxunulmazlığı çərçivəsində çözümünə tərəfdar çıxıb, ölkəmizə birmənalı dəstəklərini nümayiş etdiriblər. Bu iki ölkə Özbəkistanla bir yerdə bu günəcən Ermənistanla diplomatik münasibətləri olmayan ölkələrdir. 44 günlük Vətən müharibəsi zamanı həm dövlət, həm də millət səviyyəsində ən güclü dəstəyi də Türkiyə və Pakistandan aldıq. Ordumuzun əldə etdiyi qələbə hər iki qardaş ölkədə çoşğu ilə qarşılandı, ölkəmizin hər yerində - küçələrdə, binalarda, maşınlarda və müxtəlif tədbirlərdə Azərbaycan və Türkiyə bayraqları ilə yanaşı Pakistan bayrağı dalğalandı. Azərbaycan xalqı o günləri, o şanlı Zəfəri heç vaxt unutmayacaq, xalqların nümunəvi dostluq ənənələrini daim yaşadacaqdır.”

Bu fikirləri aia.az-a açıqlamasında Milli Məclisin deputatı Səttar Möhbalıyev səsləndirib.

Millət vəkili qeyd edib ki, Azərbaycan, Türkiyə və Pakistan arasında münasibətlərin möhkəmliyini təmin edən əsas amillərdən biri də bu münasibətlərin təkcə dövlətlərarası formatda deyil, həm də bu üç ölkənin xalqları arasında yaşanan dostluq əlaqələri əsasında mövcud olmasıdır: “Vətən müharibəsindən sonra da hər iki ölkə ilə münasibətlərini və əməkdaşlığı davam etdirən ölkəmiz bu sahədə bir çox uğurlara imza ata bilmişdir. Mayın 28-də Laçında keçirilən Azərbaycan, Türkiyə və Pakistan Üçtərəfli Zirvə görüşü buna bir nümunədir. Sayca ikinci olan Zirvə görüşündə çıxış edən cənab Prezident İlham Əliyev demişdir: “Azərbaycan, Türkiyə və Pakistan hər zaman suverenlik, ərazi bütövlüyü və ədalətin tərəfində olub. 2020-ci ildə 44 günlük Vətən müharibəsinin ilk günlərindən etibarən Türkiyə və Pakistanın ölkəmizə göstərdiyi siyasi və mənəvi dəstəyə görə bir daha minnətdarlığımızı bildiririk. Azərbaycan da öz növbəsində daim Türkiyənin və Pakistanın yanında olub. Bu gün biz bir daha xalqlarımızın birliyini təsdiqləyirik.”
Ölkələrimizin strateji mövqeyindən və dinamik iqtisadi potensialımızdan istifadə etməklə qarşılıqlı faydalar əldə etmək üçün geniş imkanlar olduğunu qeyd edən ölkəmizin başçısı bildirib ki, Azərbaycan Türkiyə iqtisadiyyatına 20 milyard ABŞ dollarından çox sərmayə qoyub, Pakistan iqtisadiyyatına 2 milyard ABŞ dolları qoymağa hazırdır. Hazırda konkret investisiya layihələri üzrə işlər gedir.”

Sonda deputat əməkdaşlıq sahələrinin genişləndirilməsinin zəruriliyi barədə cənab Prezident İlham Əliyevin səsləndirdiyi fikirlərin əhəmiyyətini vurğulayaraq bunları deyib: “Azərbaycanın enerji resurslarından səmərəli istifadə olunması, eyni zamanda müxtəlif ölkələrə çatdırılması sahəsində Türkiyənin rolunu yüksək qiymətləndirən cənab Prezident İlham Əliyev Azərbaycan və Türkiyənin əməkdaşlığı nəticəsində yalnız bölgəmizin deyil, geniş coğrafiyanın enerji xəritəsi dəyişidiyini qeyd edərək demişdir: “Ölkələrimiz enerji təhlükəsizliyinin təmin edilməsində əhəmiyyətli rola malik olub və bu gün bərpaolunan enerjinin istehsalı və ixracı istiqamətində geniş layihələrə start verilib. Bununla yanaşı, Azərbaycan və Türkiyədən keçməklə Asiya ilə Avropanı birləşdirən nəqliyyat yolları strateji əhəmiyyət daşıyır. Multimodal yük marşrutunun inkişafı yolu ilə Pakistanın da bu təşəbbüsdə yaxından iştirakının əməkdaşlığımıza daha da təkan verəcəyinə əminik.” Eyni zamanda Azərbaycanın bütün məsələlərdə qardaş Türkiyənin və Pakistanın yanında olduğunu xüsusi vurğulayan ölkə başçısı Türkiyənin terrorla mübarizəsində, pakistanın Hindistanla münasibətlərində qardaş ölkələrin yanında olduğunu biuldirərək bunun daim belə olacağını qətiyyətlə bildirmişdir. Bəli, Azərbaycanın birmənalı mövqeyi belədir. Bizim dostluğumuz da tariximiz qədər qədim, əsaslı və möhkəmdir. Hər üç ölkə liderinin bu Zirvə görüşü də bunu bir daha sübut etdi. Bu Zirvə görüşü dostluq və qardaşlığın sarsılmaz nümunəsi kimi tarixdə qalacaqdır” – deyə, Səttar Möhbalıyev fikirlərini tamamlayıb.

Tarix: 30-05-2025, 10:47 Oxunub: 28