Qazın paylanması ilə əlaqədar yaxşı uğurlarımız var

Hər bir sivil dövlətin ali məqsədi insan və vətəndaş hüquq və azadlıqlarının təmin edilməsidir. Bu baxımdan son dövrlərdə getdikcə daha çox aktuallıq kəsb edən enerji təhlükəsizliyi məsələsi nəinki xırda dövlətləri, hətta dünya güc mərkəzlərini belə daha çox düşünməyə vadar edir.
Ötən əsrin son onilliyində müstəqilliyini qazanmış Azərbaycan ilk dövrlərdə daxili enerji resurslarının istismarı ilə bağlı bir çox problemlərlə rastlaşmalı olmuşdu. Planetin ən nəhəng imperiyasından qopan bir məmləkət iqtisadi çətinliklərlə üzbəüz qalmışdı. İri istehsal sahələri, sənaye obyektləri öz fəaliyyətini dayandırmış, hər şey bərpa edilməz kimi görünən bir həddə enmişdi. O zaman ölkənin enerji müstəqilliyi özü təhlükə altına düşmüşdü.
Bir tərəfdən ağır, qanlı müharibəyə cəlb olunmuş ölkəmizi sürükləndiyi fəlakətdən xilas etmək üçün əvvəlcə hərbi əməliyyatları dayandırmaq və dinc quruculuğa keçmək üçün atəşkəs imzalanması, daha sonra isə “açıq qapı”siyasətinin elan olunması və “əsrin müqaviləsi”nin bağlanması əzəmətli strateji planların başlanğıcından xəbər verirdi. Məhz bu saziş ölkəmizin strateji inkişaf konsepsiyasının təməlidir.
Daha sonrakı illər baş verən möhtəşəm uğurlar, Azərbaycanın geosiyasi əhəmiyyətinin artdığının sübutu olan iqtisadi layihələr, müxtəlif neft-qaz kəmərləri ümummilli lider H.Əliyev ideyalarının bəhrəsi idi.
Bu ideyalar XXI əsrdə də uğurla davam etdirilərək, istər ölkəmizin, istərsə də Avropanın enerji təhlükəsizliyi naminə çox töhfələr verdi. Bu günlərdə Azərbaycan Respublikasının Prezidenti cənab İlham Əliyevin Cənub Qaz Dəhlizi Məşvərət Şurası çərçivəsində nazirlərin IX və Yaşıl Enerji Məşvərət Şurası çərçivəsində nazirlərin 1-ci iclaslarında çıxışında enerji təhlükəsizliyinin müasir dəyişən dünyamızda hər bir ölkə üçün milli təhlükəsizlik məsələsi müstəvisinə qalxdığını vurğulamış, yeni marşrutların qurulması və yeni mənbələrin cəlb olunması zərurətinə diqqət ayrılmasını tövsiyə etmişdir.
Artıq bu layihələrin böyük bir qismi həyata keçirilməsinə baxmayaraq, dəyişən maraqlar və qoca qitədə baş verən geostrateji təbəddülatlar görülən işlərin miqyasını daha da genişləndirməyə sövq etmişdir. Avropanın şərqində artıq bir ilə yaxın davam edən müharibə qitə dövlətlərini enerji problemi ilə baş-başa qoymuşdur. Bu baxımdan alternativ mənbələrin axtarışına çıxan bir çox ölkələr üçün Bakının karbohidrogen ehtiyatları ciddi əhəmiyyət kəsb etmişdir.
Qara dənizin dibi ilə çəkiləcək elektrik kabelinə gəldikdə isə iş planımızı mərhələli şəkildə və Avropanın şərtləri ilə əlaqəli şəkildə qurmaq tələb olunur. Bu, həmçinin Avropa qitəsində potensial əməkdaşlıq imkanlarımızı daha geniş miqyasda müəyyən etmək üçün lazımdır. Əminəm ki, Rumıniya və Macarıstan yaşıl enerjini qəbul edəcək son məntəqələr olmayacaqdır.
Qazın paylanması ilə əlaqədar yaxşı uğurlarımız var. Biz yaşıl enerji ilə bağlı saziş imzalamışıq. Biz, həmçinin təbii qaz və bərpaolunan enerji imkanları arasında səmərəliliyin artırılmasına əsaslanan qarşılıqlı əlaqə yaratmalı və bunu vahid paket çərçivəsində etməliyik. Bizim güclü siyasi iradəmiz və əlbəttə ki, fəaliyyətimizin uğurlu tarixçəsi var. Bizim müxtəlif formatlarda və müxtəlif ölkələrlə birgə həyata keçirdiyimiz bütün layihələr istər Bakı-Tbilisi-Ceyhan neft boru kəməri, istər Bakı-Tbilisi-Ərzurum qaz boru kəməri, istərsə də Cənub Qaz Dəhlizi – hamısı uğurlu olmuşdur.

Zabrat qəsəbəsi, 192 saylı tam orta məktəbin
tarix müəllimi Elxan İsmayılov

Tarix: 7-02-2023, 09:34 Oxunub: 79