İlk dəstək ölkəmizdən oldu

Tarix 06.02.2023-cü il. Saat 04:17. Türkiyə Kahramanmaraş mərkəz olmaqla iki böyük zəlzələylə sarsıldı. Birincisi 7.7 bal, ikincisi 7.6 bal gücündə olan zəlzələ Kahramanmaraş, Kilis, Diyarbakır, Adana, Osmaniyə, Gaziantep, Şanlıurfa, Adıyaman, Malatya ve Hatayda böyük dağıntılara səbəb oldu. Bu zəlzələ nəinki Türkiyəni, bütün dünyanı yasa boğdu.Türkiyə Prezidenti Rəcəb Tayyib Ərdoğan ölənlərin xatirəsini anmaq üçün ölkədə 7 günlük matəm elan etdi. Bundan başqa, ölkənin zəlzələ baş verən 10 şəhərində 3 aylıq fövqəladə vəziyyət elan olundu. Bu hadisə Türkiyədə 1939-cu ildən bəri qeydə alınan ən güclü zəlzələ kimi tarixə düşdü. Nəticədə elə bir mənzərə yaranıb ki,gözlər kor olmaq istəyir,elə bir ağrı yaranıb ki, insan daş olmaq istəyir, elə bir hüzn var ki, ürək yox olmaq istəyir. Ölümlə savaşan körpələr, uşaqlar, analar, atalar, ailələr dağılıb gedən xəyallar, həyatlar... və yemək yeməkdən, başımızı yastığa qoymaqdan, isti yatağa sahib olmaqdan utanan bizlər. Lakin zamana qarşı yarışın davam etdiyi bölgələrdən ümidləndirən xəbərlərdə də gəlir.Hər ümidsizliyin ardında neçə ümidlər var, hər qaranlığın ardında neçə günəşlər var...
    Kahramanmaraş zəlzələsinin ardından dünyanın dörd bir yanından Türkiyəyə dəstək olundu və bu dəstək hələdə davam edir. Türkiyəyə 95-dən çox ölkə ve 16 beynəlxalq qurumdan yardım təklifi göndərildi.Bu ölkələr içərisində təbii olaraq ilk dəstək ölkəmizdən oldu.     Türkiyədə baş vermiş zəlzələnin nəticələrinin aradan qaldırılması ilə bağlı Azərbaycanın faciə baş verdiyi saatdan bu vaxtadək FHN-in 725 nəfərlik şəxsi heyəti Türkiyəyə göndərilib. Onlardan 34 nəfəri həkim və 7 nəfəri texniki işçi olmaqla tibbi heyətə aiddir.Yardım xilasetmə işlərində iştirak edən şəxsi heyət və tibbi personaldan başqa, xilasetmə işlərində istifadə olunan ləvazimatlar, generatorlar, nasos stansiyaları, avtomobillər, həmçinin modul səhra hospitalları, tibbi avadanlıq, dərman preparatları, təxirəsalınmaz yardım vasitələri, çadırlar, yataq dəstləri və sair, habelə zərər çəkmiş əhali üçün humanitar yardımı əhatə edir. Faciədən zərər çəkmiş şəxslər üçün Heydər Əliyev Fondu tərəfindən 36 ton humanitar yardım göndərilib. Humanitar yardıma müxtəlif dərman preparatları, oksigen maskaları, filtrli sistemlər, sarğı materialları, onurğa taxtaları, ilkin yardım boyunluqları, xərək və s. tibbi ləvazimat və avadanlıqlar, isti geyimlər, çadırlar daxildir.Humanitar yardıma dağıntılardan ziyan çəkmiş insanların yerləşdirilməsi üçün çadır,çarpayı, generator,geyim dəsti,corab, masa, oturacaq, dəsmal və digər ləvazimatlar daxildir.        Həmçinin Azərbaycan Respublikasının Prezidenti İlham Əliyev Türkiyənin Prezidenti Rəcəb Tayyib Ərdoğana məktub ünvanlayıb və Türkiyə xalqına başsağlığı verib, yaralılara şəfa diləyib. Eyni zamanda Prezident İlham Əliyev Türkiyə Prezidenti Rəcəb Tayyib Ərdoğana telefon zəngi edərək hər zaman Azərbaycanın və Türkiyənin bir-birinin yanında olduğunu bildirib. Bundan əlavə olaraq Prezident İlham Əliyev Türkiyə Respublikasının Azərbaycandakı səfirliyində olub. Buradakı çıxışı zamanı zəlzələnin ilk dəqiqələrindən Türkiyənin yanında olduğumuzu, bir balaca köməyimizin belə bizim üçün şərəf olduğunu, Azərbaycanın sona qədər dəstək olacağını bildirib. Eyni zamanda qeyd edib ki, Azərbaycan xalqı, ictimai təşkilatlar, özəl şirkətlər, bütün dövlət qurumları könüllü olaraq əlindən gələn heç bir köməyi əsirgəmir,əsirgəməyəcək.Prezident bildirib ki, bu inanılmaz dərəcədə böyük faciədir,bu ağır sınaq Türkiyənin gücünü bir daha bütün dünyaya göstərəcək, Türkiyə dövləti bu çətinliyi də aşacaq və bu acı sınaqdan şərəflə çıxacaq.

Balaxanı qəsəbəsi, 259 nömrəli tam orta məktəbin
Azərbaycan dili və ədəbiyyat müəllimi Türkan Osmanova

Tarix: 13-02-2023, 13:16 Oxunub: 144