Uçuşlar ləğv edilir: Bazar yanacaq böhranı səbəbindən milyonlarla yer itirib

Dünyanın aviakompaniyaları may ayında uçuş cədvəllərini kütləvi şəkildə azaltmağa məcbur qalıb.

Valyuta.az xəbər verir ki, son iki həftədə aviasiya bazarından təxminən 2 milyon sərnişin yeri çıxarılıb. Səbəb kimi yaxın həftələrdə aviasiya yanacağının çatışmazlığı ilə bağlı narahatlıqlar göstərilir.

“Cirium” analitik şirkətinin məlumatına görə, minlərlə reys ləğv edilib, bəzi marşrutlarda isə yanacağa qənaət etmək üçün daha kiçik və ya daha iqtisadi təyyarələrdən istifadə olunur.

Qeyd olunur ki, İran və İsrail arasında fevralın sonlarında başlayan müharibədən sonra aviasiya yanacağının qiyməti iki dəfə artıb. Bu, biletlərin bahalaşmasına səbəb olub. Eyni zamanda Fars körfəzindəki hava limanlarının bağlanması Avropa–Asiya marşrutlarının təxminən üçdə birini pozaraq qlobal səyahət sistemində ciddi disbalans yaradıb.

"Emirates", "Etihad" və "Qatar Airways" kimi Körfəz regionu aviadaşıyıcıları fəaliyyətlərini yenidən bərpa etməyə çalışsalar da, may ayı üçün uçuş cədvəllərində ciddi ixtisarlar aparıblar. Ümumilikdə may ayında mövcud yerlərin sayı 132 milyondan 130 milyona düşüb.

Eyni proses "British Airways", "United", "China Air" və Yaponiyanın ANA kimi böyük beynəlxalq şirkətlərinə də təsir edib. Aviadaşıyıcılar qlobal şəbəkələrini yenidən quraraq dar boğazları azaltmağa çalışırlar.

Aviasiya analitiki Con Striklend bildirib ki, yanacaq bazarındakı vəziyyət hava daşımalarını ciddi risk altına alıb: “Avropadan Asiyaya uçan şirkətlər geri dönüş üçün kifayət qədər yanacağın olmayacağı riskini nəzərə alır. Qiymətlər həmişə dəyişkən olub, amma mənim təcrübəmdə heç vaxt yanacaq qıtlığı riski bu qədər real olmayıb”.

“Air France” bildirib ki, Sinqapur və Tokio (Haneda) istiqamətində əlavə reyslərin artırılmaması barədə müraciətlər alıb, çünki Asiyanın iri aviasiya mərkəzləri yanacaq istehlakını azaltmağa çalışır.

Yaponiyanın ANA şirkəti əlavə xərclərin 810 milyon dollara yaxın olacağını, “Japan Air” isə mənfəətin təxminən beşdə bir azalacağını proqnozlaşdırır.

ABŞ-ın "Delta Air Lines" şirkəti yanacağa qənaət məqsədilə şəbəkəsinin 3,5 faizini ixtisar edib. Almaniyanın "Lufthansa" şirkəti isə may–oktyabr dövründə təxminən 20 min reysi ləğv edib.

Türkiyə Hava Yolları və "Air China" da son həftələrdə ən çox reys azaldan şirkətlər sırasında yer alıb.

Daha əvvəl ABŞ-ın "Spirit Airlines" şirkətinin maliyyə çətinlikləri səbəbindən minlərlə reysi ləğv etdiyi və işçi ixtisarına getdiyi bildirilmişdi.

Avropada isə kiçik regional hava limanları da sərnişin tələbatının azalması və yanacaq qiymətlərinin artması səbəbindən ciddi çətinliklərlə üzləşib. Xüsusilə regiondaxili reyslərdə azalma müşahidə olunur.

Tarix: 5-05-2026, 08:18 Oxunub: 17