“Moskvada “Birlik Kuboku” davam edərkən ertəsi gün oyunumuz vardı. Bizdə Zakir adlı masajçı işləyirdi. Səhv etmirəmsə, indi də bu sahədədir. Onun ağır çəkisi vardı. Baş məşqçimiz Ağasəlim Mircavadovla birgə onunla zarafat etdik ki, sabah oyunumuz var, mütləq çəki salmalısan”.
Oxu.Az xəbər verir ki, bu sözləri Peşəkar Futbol Liqasının (PFL) prezidenti Ramin Musayev deyib.
O, “Neftçi”nin sabiq vitse-prezidenti kimi bu gündən test yayımına başlayan “Neftçi TV”nin ilk qonağı olub. PFL prezidenti “Neftçi”də işlədiyi müddətdə maraqlı əhvalatlardan danışıb:

“Gecə saat üçdə-dörddə Ağasəlim müəllimlə otaqda oturub çay içirik, sabahkı oyunu müzakirə edirik. Bir də gördük ki, hoteldən sanki qatar səsi gəlir. Fikirləşdik ki, birdən təxribat olar. Dəhlizə çıxdıq ki, Zakir hər əlində bir ağır su qutusu o tərəf-bu tərəfə qaçır. Dedik ki, Zakir, zarafat edirdik, get yat”.
O, daha sonra “Neftçi”nin ölkə xaricindəki yay təlim-məşq toplanışı zamanı komandaya kabab bişirməsindən danışıb:
“Almaniya ilə Hollandiyanın arasında yerləşən hoteldə qalırdıq. Baş məşqçi komandaya iki günlük fasilə vermişdi. Mən də fikirləşdim ki, futbolçuları bu iki gündə necə əyləndirək. Gedib iki qoyun aldıq. Hər qoyunun çəkisi də 35-40 kq idi. Bu işi bacardığım üçün onlar üçün qoyunu kəsib, qəşəng kabab bişirmək istəyirdim. Hotelin alt tərəfi meşəlik idi. Orada da şiş olmadığından, ağac budaqlarından şiş düzəltdik. Yerə manqal əvəzi daşlar düzdük. Futbolçular hamısı əllərində qab kababın bişməsi üçün növbəyə durmuşdular. O şəkillər indi də məndə var.
Hotel sahibinə də kabab göndərdim. Bundan çox razı qaldı. Dedi, bunun qarşılığında nə edə bilərəm? Dedim ki, hotelinizdə bizim bayrağımızı qaldır. Elə də etdi. Biz orda da həmin qonaqpərvərliyi göstərdik”.