Azərbaycan Respublikası böyük bir uğura imza atdı

Məşhur bir aforizimdə deyilir ki, “ düşmən səni təsadüfən incidən deyil, bunu bilərəkdən edəndir “. Azərbaycan Respublikası isə tarixin ən üzsüz düşməni ilə üz-üzə dayanıb. Erməni deyilən bu varlıqlar torpaqlarımıza gəldikləri gündən onlara olan xoş münasibəti, humanizi hər dəfə məhv etməyi bacarmış, nankorluqları ilə tanınmışdırlar. Yaxın keçmişdə baş verən 44 günlük müharibə zamanı Azərbaycan ordusu Ermənistana misli görülməmiş dərs vermişdir. Qarşı tərəf özü də yaxşı bilirdi ki, Azərbaycan əsgəri istəsəydi bayrağını öz qədim haqq torpaqları olan İrəvana belə sancardı, lakin bunu etməyib sülhə imza atdıqsa, bu Azərbaycan tərəfinin məsələyə olan humanist yanaşmasına, problemin sülh yolu ilə həlli tərəfdarı olmasına dəlalət edirdi. Keçən zaman düşmənin mənfur xislətini yenə ortaya qoydu. Verilən vədlər, götürülən öhdəliklər unuduldu. Azərbaycan tərəfi yenə bu hadisələrin fonunda səbrli davranmağa, qarşı tərəfi sülhə dəvət etməyə davam etsə də, baş verən son hadisələr artıq lazimi sonu qaçınılmaz edirdi.
Erməni terrorçularının döyüş mövqelərinin şəxsi heyət, zirehli texnika, artilleriya qurğuları və digər atəş vasitələri ilə gücləndirməsi, bölmələrin yüksək döyüşə hazırolma səviyyəsinə gətirməsi, səfərbərlik üzrə əlavə bölmələrin yaratması, Azərbaycan Ordusunun bölmələrinə qarşı kəşfiyyat fəaliyyətlərinin genişləndirməsi, mövqelərimizin dərinliyinə sızaraq minalardan təmizlənmiş ərazilərin və mülki təyinatlı yolların terror-təxribat məqsədilə yenidən minalaması son bir neçə aydır Azərbaycan tərəfini narahat edən bir məsələyə çevrilmişdir. Təbii ki, bu addımlar qarşısında Azərbaycan tərəfi susmayacaq, öz mövqeyini göstərəcəkdi. Sentyabrın 19-da Ermənistan silahlı qüvvələrinin Azərbaycanın Qarabağ bölgəsindəki birləşmələrinin kəşfiyyat-diversiya qrupları tərəfindən Əhmədbəyli-Füzuli-Şuşa avtomobil yolunda terror məqsədilə əvvəlcədən quraşdırılmış minanın partlaması nəticəsində Azərbaycan Avtomobil Yolları Dövlət Agentliyinə məxsus nəqliyyat vasitəsi sıradan çıxmış və mülki şəxslərin həlak olması, Daxili İşlər Nazirliyinin Daxili Qoşunlarının hərbi qulluqçularını daşıyan nəqliyyat vasitəsinin də Ermənistan silahlı qüvvələrinin kəşfiyyat-diversiya qrupları tərəfindən quraşdırılmış minaya düşməsi nəticəsində hərbi qulluqçularımızın həlak olması və yaralanması Azərbaycan tərəfinin səbrini tükədən son amil oldu. Qarabağ bölgəsindəki Ermənistan silahlı qüvvələrinin birləşmələrinin mövcudluğunu davam etdirməsi regional sülh və sabitlik üçün ciddi təhlükə mənbəyi olması Azərbaycan ordusunun işə əl qoymasına və regiondakı terrorçu qruplaşmaların təmizlənməsi üçün bölgədə lokal xarakterli antiterror tədbirlərinə başlamasına rəvac verdi.
Antiterror tədbirlər çərçivəsində Ermənistan silahlı qüvvələrinin birləşmələrinin ön xətt və dərinlikdə olan mövqeləri və uzunmüddətli atəş nöqtələri, eləcə də döyüş vasitələri və hərbi təyinatlı obyektləri yüksək dəqiqlikli silahların tətbiqi ilə sıradan çıxarılmış, Prezident İlham Əliyevin şəxsən tapşırığına əsasən əməliyyatlar zamanı mülki əhali və infrastruktur obyektləri hədəfə alınmamış yalnız legitim hərbi hədəflər sıradan çıxarılmışdır. Azərbaycan tərəfi həyata keçirdiyi əməliyyatları çoxgüclü dəqiqliklə və hesablanmış planlar əsasında həyata keçirdi. Məhz bu güclü planlama, qoyulan qəti mövqe, hesablanan ən xırda amil qarşı tərəfin əməliyyatlara yalnız 24 saat tab gətirməsinə səbəb oldu. Erməni terrorçuları Azərbaycan əsgəri qarşısında diz çökdü. Bölgədə sülh və sabitliyə nail olmağın yeganə yolu olan erməni silahlı qüvvələrinin Azərbaycanın Qarabağ bölgəsindən qeyd-şərtsiz və tamamilə çıxarılması, qondarma rejimin buraxılması tələbinin yerinə yetirilməsinə qarşı tərəf məcbur edildi.
Azərbaycan Respublikası böyük bir uğura imza atdı. 3 il ərzində edilən güzəştlərin göz ardına vurulması baş verən hadisələrin əsas səbəbidir, Ermənistan tərəfi baş verən hadisələrdə birbaşa təqsirkardır. Düşmən unudur ki, onun qarşısında məğlub edilməz Azərbaycan əsgəri dayanıb, unudur ki, Azərbaycan güclü, düşünülmüş bir siyasətlə idarə olunur, unudur ki, bu xalq bir yumruq kimi birləşməyi bacarır. Azərbaycan öz ərazisində haqlı mövqeyini bərpa edərək, suverenliyinin təhlükəsizliyini təmin etdi. Bu yolda canından keçən oğullarımızın ruhu şad olsun, Tanrı şanlı xalqımızı və ordumuzu qorusun...

Balaxanı qəsəbəsi, 69 № tam orta məktəbin
tarix müəllimi Xəyalə Əsgərli

Tarix: 21-09-2023, 14:54 Oxunub: 197