Eltun Süleymanov: "Qadın hüquqlarının qorunması dövlət siyasətinin tərkib hissəsidir"

Hər il martın 8-də dünya qadınlarının əzəmətini qeyd etmək məqsədilə Beynəlxalq Qadınlar Günü təntənə ilə keçirilir. Bu gün, yalnız qadınların hüquqlarının qorunması və gender bərabərliyinin təmin olunması üçün bir çağırış deyil, həm də onların cəmiyyətə verdiyi töhfələrin təntənəsidir. Azərbaycanda da bu günün əhəmiyyəti böyükdür və ölkəmizdəki qadınların rolu hər keçən gün daha da yüksəlir. Qadınların Tarixi Rolu və Azərbaycan Cəmiyyətindəki Yeri də göz qabağındadır. Yəni Azərbaycan tarixində qadınların mühüm rolu daima ön planda olmuşdur. Həm qədim dövrlərdə, həm də müasir dövrdə qadınlar cəmiyyətin müxtəlif sahələrində – siyasətdən tutmuş mədəniyyətə, təhsildən səhiyyəyə qədər hər sahədə aktiv yer almışdır. Azərbaycan qadını, xüsusilə müstəqil dövrdə, həm iqtisadi, həm də sosial sahələrdə böyük uğurlar qazanmışdır. Müstəqil Azərbaycanda qadınların siyasi iştirakını artırmaq, onların iş həyatında və ictimai fəaliyyətlərdə daha fəal olmalarını dəstəkləmək məqsədilə müxtəlif qanunvericilik və proqramlar tətbiq edilib.

Bu sözləri aia.az-a açıqlamasında Nəsimi Rayon İcra Hakimiyyəti yanında İctimai Şuranın sədr müavini Eltun Süleymanov deyib.

Müsahibimiz deyib ki, ölkədə qadın siyasətinin əsasını Ulu öndər Heydər Əliyev qoyub. Ulu Öndər ölkə həyatının bütün sahələrində qadınlara xüsusi yer ayırdı, onların hərtərəfli fəaliyyətinə geniş meydan verdi, lider qadınlar yetişdirdi. Ölkəmizdə dövlət səviyyəsində qadın siyasətinin əsasını qoyan Ümummilli Lider Heydər Əliyev qadın şəxsiyyətinə böyük hörmətlə yanaşırdı. İndi fəal vətəndaşlıq mövqeyini sərgiləyən çox sayda Azərbaycan qadını var. Dövlət müstəqilliyimizin bərpasından sonra Azərbaycan qadını milli dövlət quruculuğu prosesinin fəal iştirakçısına çevrilmiş, ölkəmizin sosial-iqtisadi və mədəni potensialının artırılması üçün dəyərli töhfələr vermişdir. Azərbaycan qadını tarix boyu müqəddəs ana şərəfini uca tutaraq öz mübarizliyi ilə tanınmış, qadınlarımız ölkənin ictimai-siyasi, mədəni həyatında fəal iştirak etmiş, dövlətin idarə olunmasında daim fədakarlıq nümayiş etdirməklə yanaşı döyüş meydanlarında da şücaət göstərmişdir. Tarixi bir həqiqət də odur ki, cənab Prezident İlham Əliyev qadın siyasətinin mükəmməl nümunəsini yaradıb. Prezident İlham Əliyevin hər il 8 Mart Beynəlxalq Qadınlar Günü münasibətilə Azərbaycan qadınlarına ünvanladığı təbrik dövlət başçısının qadınlara olan diqqətinin və ehtiramının təcəssümüdür. Dövlət başçısı respublikamızın qazandığı uğurlarda qadınların rolunu yüksək qiymətləndirir: “Biz hamımız dinamik inkişaf edən ölkəmizin irimiqyaslı iqtisadi layihələrin iştirakçısı kimi əldə etdiyi yüksək göstəricilərlə haqlı olaraq fəxr edirik. Bu tərəqqinin bəhrələri respublikamızın hər bir guşəsində özünü aydın hiss etdirir. Həmin nailiyyətlərdə Azərbaycan qadınlarının böyük rolu danılmazdır. Qədim zamanlardan bəri Vətənə və torpağa sədaqəti ilə seçilən qadınlarımız milli məfkurəyə sadiq qalaraq bu gün də suveren Azərbaycan Respublikasının güclənməsi naminə töhvələr verirlər. Onlara xas olan işguzarlıq, müdriklik, yüksək daxili mədəniyyət və xalqımızın yüzillər boyu təşəkkül tapmış zəngin milli-mənəvi sərvətlərinə sədaqət müasir Azərbaycan qadınının ictimai həyatımızda mövqeyini və simasını müəyyən edir”. Ölkənin Birinci vitse-prezidenti və “yumşaq güc”ün rəmzisi Mehriban xanım Əliyeva buna ən gözəl nümunədir. Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban xanım Əliyeva hərtərəfli fəaliyyəti ilə həm ölkədə, həm də beynəlxalq aləmdə Azərbaycan qadının nüfuzunu daha da yüksəklərə qaldırır. Mehriban xanım Əliyevanın hərtərəfli parlaq fəaliyyəti, xeyirxahlıq missiyası, mədəniyyətimizin bütün dünyada təbliği sahəsində gördüyü işlər əsl örnəkdir. Ölkənin “Yumşaq güc” siyasətinin təcəssümü olan Mehriban xanım Əliyevanın humanitar layihələri ölkəmizə yeni dostlar qazandırır. Mehriban xanım Əliyevanın xeyriyyəçilik tədbirləri bir sıra ölkələri, qitələri əhatə edir, prezidenti olduğu Heydər Əliyev Fondu uzun illərdir ki, Azərbaycanın humanitar və mədəni diplomatiyasının səlahiyyətli nümayəndəsinə çevrilib və bu fəaliyyət hər şeydən əvvəl dünyada Azərbaycanın təqdimatı və təbliğidir. Ölkənin Birinci vitse-prezidentinin rəhbərliyi ilə milli maraqlarımıza xidmət edən və ənənələrimizi yaşadan çoxlu sayda böyük layihələrin uğurla icra olunması Azərbaycan qadınının mərhəmət və xeyirxahlığının, zəngin mənəvi-intellektual və yüksək əxlaqi dəyərlərə malik olduğunun bariz nümunəsidir. Onu da deyim ki, qadın hüquqlarının qorunması dövlət siyasətinin ayrılmaz tərkib hissəsidir. Qadınlarla bağlı məsələlərin həlli üçün bir çox qanunların qəbul olunması, fərman və sərəncamların imzalanması, beynəlxalq təşkilatlara üzv olaraq mühüm sənədlərin ölkəmizdə tətbiq olunması qadın hüquqlarının reallaşması və təminatı istiqamətində inkişafın əldə olunmasına təkan vermişdir. Azərbaycanda qadın hüquqlarının qorunması, təbliğ olunması, qadınların dövlət siyasətinin həyata keçirilməsində və qanunların qəbul edilməsində iştirakının artırılması dövlət siyasətinin ayrılmaz tərkib hissəsidir. Azərbaycan qadınlarının ilk qurultayı isə tarixi əhəmiyyətə malikdir. 1998-ci il sentyabrın 25-də keçirilmiş Azərbaycan qadınlarının ilk qurultayı dövlət qadın siyasətinin tarixində olduqca mühüm hadisədir. Respublikada cərəyan edən mürəkkəb ictimai-siyasi proseslərin gedişində Azərbaycan qadınlarının daim milli dövlətçilik mövqeyindən çıxış etdiklərini nümayiş etdirən qurultayda mühüm məsələlər müzakirə olunmuşdur. 1998-ci ildən etibarən hər beş ildən bir Azərbaycan qadınlarının qurultayları keçirilir. Bu qurultaylar dövlət qadın siyasəti sahəsində ən əlamətdar və böyük hadisələrdən biri kimi qiymətləndirilir. Azərbaycanın müxtəlif bölgələrində 8 Martda xüsusi tədbirlər və mərasimlər keçirilir. Bu gündə qadınlar həm ailə daxilində, həm də cəmiyyətdə əhəmiyyətli bir rol oynadıqlarını hiss edirlər. Tədbirlər, sərgilər, konsertlər və digər mədəniyyət fəaliyyətləri ilə qadınların mübarizəsi və nailiyyətləri qeyd olunur. Bundan əlavə, Azərbaycanın qadınları çoxsaylı sahələrdə uğurlar əldə edərək gənc nəslə örnək olurlar. Mədəniyyət, incəsənət, elmi və akademik sahələrdə çalışan qadınlar, həmçinin sosial xidmət sahəsindəki fəaliyyətləri ilə tanınmış şəxslər arasında yer alır. Son illərdə Azərbaycanda qadınların təhsil sahəsindəki inkişafı da əhəmiyyətli dərəcədə artıb. Qadınların ali təhsil alması və iş dünyasında yer tutmaları ilə bağlı statistik göstəricilər hər il yüksəlməkdədir. Həmçinin, qadın sahibkarlığı sahəsindəki artım da müsbət bir meyldir. Bir çox qadın öz biznesini quraraq iqtisadiyyatın inkişafına töhfə verir - deyə E. Süleymanov fikrini yekunlaşdırıb.

Tarix: 4-03-2025, 10:09 Oxunub: 126