Cənub Qaz Dəhlizi layihəsi müasir tarixdə çox azsaylı layihələrdən biridir ki, icrası üçün bütün aparıcı beynəlxalq maliyyə institutları öz töhfəsini vermişdir

2018-ci il mayın 29-da Cənub Qaz Dəhlizinin rəsmi açılışından sonra bəzi mütəxəssislər artıq Məşvərət Şurasının keçirilməməsi ilə bağlı müzakirələr edirdilər. Layihə tamamlanıbsa, 2020-ci ilin dekabrın 31-də artıq qazın nəqlinə də başlanıbsa, bəs iclaslarda nə müzakirə olunacaqdı? Bu sualın cavabını Məşvərət Şurasının V toplantısında prezident İlham Əliyev çox gözəl bir şəklidə vermişdi: “ Təşkilatçılar arasında maraqların vaxtaşırı dəyişməsinə baxmayaraq onların hamısı Cənub Qaz Dəhlizi Məşvərət Şurasına ehtiyac duyur və ümumi həllər naminə çalışır. Hesab edirəm ki, Cənub Qaz Dəhlizi layihəsinin tamamilə işlək vəziyyətdə olmasına baxmayaraq bu cür uğurlu regional əməkdaşlıq formatını tərk etməzdən öncə düşünmək lazımdır. Məşvərət Şurası, yəni biz hamımız çevik dəyişən enerji aləmində vacib müzakirə formunu təşkil etməyə davam edə bilərik.” Bu çıxış Məşvərət Şurasının digər toplantılarının da keçirilməsini labüd etdi.
Bakıda “Gülüstan” sarayında Avropa İttifaqının komissarları, Amerika Birləşmiş Ştatları, Böyük Britaniya, Türkiyə, Gürcüstan, İtaliya, Yunanıstan, Bolqarıstan və digər ölkələrin yüksək səviyyəli nümayəndələrinin iştirakçıları ilə təşkil olunan Məşvərət Şurasının V toplantısında bir çox həlli vacib olan məsələlər qeyd olundu. İclasda prezident İlham Əliyevin çıxış nitqi xüsusi bir maraq doğurdu.
Cənub Qaz Dəhlizinin sonuncu hissəsi olan TAP layihəsinin uğurla tamamlandığını qeyd edən ölkə başçısı bu layihənin həyata keçirilməsində Avropa Komissiyası, təşkilatçı Azərbaycan, iştirakçı ölkələr, maliyyə institutlarının rolunu xüsusi qeyd etdi.
Cənub Qaz Dəhlizi layihəsi müasir tarixdə çox azsaylı layihələrdən biridir ki, icrası üçün bütün aparıcı beynəlxalq maliyyə institutları öz töhfəsini vermişdir. Buna görə də İlham Əliyev bu layihəni XXI əsrin ən böyük layihələrindən biri hesab etdiyini toplantıda dəfələrlə diqqətə çatdırdı.
Azərbaycan layihəyə üzv ölkələri qazla təmin etmədə çətinlik yaşamasa da, qaza olan tələbatın artması iclasın əsas məsələlərindən biri idi.İşğaldan azad olan torpaqlarımızda bərpa işlərinin aparılacağını bütün çıxışlarında diqqətə çatdıran ölkə başçısı bu çıxışında da böyük qayğıya ehtiyacı olan və öz əhalisini gözləyən torpaqlarımızı unutmadı. Əhalinin artması səbəbindən qaza olan tələbatın artdığını qeyd edən prezident eyni zamanda bütün infrastrukturu dağıdılmış və ərazisi 10000 km2-dən çox olan azad olunmuş torpaqlarımızın qazla təchizinin də tələbatda artım edəcəyini vurğuladı.
Bütün dünyada qaza olan tələbatın gündən-günə artdığını nəzərə alsaq, iclasın gündəliyində bu məsələnin olması gözlənilən idi. Gələcəyə ümidlə baxmağa çağıran ölkə başçısı yaxşı nəticə verəcəyinə inandığı qaz yataqları haqqında da fikirlərini iştirakçılarla bölüşdü. Qaz ehtiyatı 400 milyard kubmetr olan “Babək”, qaz ehtiyatı 200 milyard kubmetr olan “Ümid” qaz yataqlarından əlavə çoxdan istismarda olan neft-qaz yataqlarımızdan- Azəri-Çıraq-Günəşlidən də böyük gözləntilərin olduğunu diqqətə çatdıran İlham Əliyev
adını qeyd etmədiyi bir yatağın da tezliklə istismara veriləcəyini iştirakçılara və ictimaiyyətə elan etdi.
Bundan əlavə iclasda alternativ enerji istehsalının artırılması ilə bağlı məsələ qeyd olundu.Bu məsələ prezident İlham Əliyevin müəyyən etdiyi müasir inkişaf strategiyasında əsas məsələlərdəndir.Təkcə işğaldan azad olunmuş ərazilərin timsalında alternativ enerji potensialını təsəvvür etmək mümkündür: “ İlkin qiymətləndirmələrə görə, bölgənin günəş enerjisi potensialı 400 MVT, külək enerji potensialı isə 500 MVT- dır. Günəş enerjisi əsasən, Kəlbəcər, Laçın, Qubadlı, Zəngilan, Cəbrayıl, Füzuli rayonlarında, külək enerjisi Laçın və Kəlbəcərdə daha yüksək qiymətləndirilir.Tərtər, Həkəri kimi əsas çaylar və onların qollarından isə elektrik istehsalı əlverişli sayılır.”
Cənub Qaz Dəhlizi layihəsi dünyaya nəyin mümkün olduğunu nümayiş etdirdi və onu göstərdi ki, müxtəlif layihə iştirakçılarını bir araya gətirmək olar.
İclasda İlham Əliyev dərin məzmunlu və ardıcıl çıxışı ilə fərqləndi.Prezident İlham Əliyevin təşəbbüsü ilə yaradılmış Məşvərət Şurası çoxtərəfli əməkdaşlığın uğurlu nümunəsi oldu.Ölkə başçısının toplantıda səsləndirdiyi fikirlər, aktuallaşdırdığı məsələlər Cənub Qaz Dəhlizinin gələcək fəaliyyəti üçün aydın istiqamətlər idi.
Bakı şəhəri Maştağa qəsəbəsi 293 №-li tam orta məktəbin Azərbaycan dili və ədəbiyyat müəllimi İsmayılova Simuzər

Tarix: 10-02-2022, 09:00 Oxunub: 228