Azərbaycan-Avropa İttifaqı münasibətlərinin böyük gələcəyi var

Azərbaycan özünün beynəlxalq əlaqələrini sürətlə və uğurla inkişaf etdirir. Əlbəttə ki, Avropa İttifaqı da ölkəmiz üçün olduqca önəmli tərəfdaşlardan biridir. Bu baxımdan iyulun 18-də Azərbaycan ilə Avropa İttifaqı arasında imzalanmış “Azərbaycan Respublikası ilə Avropa Komissiyası tərəfindən təmsil olunan Avropa İttifaqı arasında enerji sahəsində Strateji Tərəfdaşlığa dair Anlaşma Memorandumu” münasibətlərin daha da dərinləşməsi və inkişaf etdirilməsi yönümündə xüsusi əhəmiyyət kəsb edən sənəddir. Məlumdur ki, Azərbaycan ilə Avropa İttifaqı arasında əməkdaşlığın ən böyük hissəsi məhz enerji sahəsində həyata keçirilir. Memorandumun imzalanması mərasimindən sonra mətbuata bəyanatla çıxış edən Ölkə Prezidenti cənab İlham Əliyevin də qeyd etdiyi kimi, Azərbaycan enerji sahəsində Avropa Komissiyası ilə on beş ildən artıq bir müddətdir ki, əməkdaşlıq edir. 18 iyul Memorandumu isə Azərbaycan ilə Avropa İttifaqı arasında imzalanan ilk sənəd deyil. Belə ki, bu tərəfdaşlar arasında hələ 2006-cı ildə Anlaşma Memorandumu və 2011-ci ildə Cənub Qaz Dəhlizi ilə bağlı Birgə Bəyannamə imzalanıb.
Öz çıxışında möhtərəm dövlət başçımız bunu da qeyd etdi ki, bu gün Azərbaycanın başlatdığı və Avropa İttifaqının dəstəklədiyi enerji layihələri Avropanın enerji xəritəsini tamamilə dəyişdirir. Əlbəttə ki bu baxımdan Xəzər dənizini Qara dəniz və Aralıq dənizi ilə birləşdirən neft kəmərinin çəkilməsi kimi möhtəşəm bir layihənin iki ildən də az müddətə reallaşdırılması xüsusi qeyd olunmalıdır. Bu gün 3500 kilometr uzunluğu olan Cənub Qaz Dəhlizi boru kəməri sistemlərini inteqrasiya edərək Azərbaycanın təbii qazını Avropa qitəsinə çatdırır. Hazırda Cənub Qaz Dəhlizinin bütün seqmentlər tam istismar olunur. Bu layihə ölkəmizin Avropanın enerji təhlükəsizliyi məsələsinə verdiyi ən böyük töhfələrdən biridir.
İmzalanmış Memorandumdakı mühüm məqamlardan biri də bərpaolunan enerji hasilatı ilə bağlıdır. Məlumdur ki, Azərbaycan bərpaolunan enerji sahəsində də çox böyük potensiala malikdir. Bu potensial ölkəmizin təkcə qonşu dövlətlərə deyil, həmçinin Avropaya da enerji satışı imkanlarının artıracaq. Bu baxımdan Xəzr dənizinin külək enerjisini və “yaşıl” hidrogen potensialı Avropa ölkələri üçün daha maraqlıdır. Təsadüfi deyil ki, bu məsələlər Ölkə Prezidenti cənab İlham Əliyevin Avropa Komissiyasının Prezidenti xanım Ursula Fon der Lyayen ilə keçirdiyi geniş tərkibdə görüşdə də ətraflı müzakirə olunub. Artıq əminliklə demək olar ki, Azərbaycan tədricən Avropa İttifaqı üçün həm də bərpaolunan enerji növlərini təchiz edən mühüm və etibarlı tərəfdaşa çevriləcək.
Bu gün Azərbaycan Xəzərdə ən iri ticarət donanmasına, müasir infrastruktura, gəmiqayırma imkanlarına, yeni və müasir dəniz limanına, bütün qonşu ölkələrlə bizi birləşdirən dəmir yollarına sahib olmaqla, enerji sektoru kimi nəqliyyat-logistika sahəsində də etibarlı tərəfdaşdır. Bu gün Azərbaycan ilə Avropa İttifaqı arasında artıq yeni saziş hazırlanır. Bu məsələ də aparılan müzakirələrdə xüsusi yer almışdır və artıq gələn ay yani sazişin imzalanacağını gözləmək olar. Bu, Azərbaycan ilə Avropa İttifaqı arasında ikitərəfli əməkdaşlığa mühüm töhfə olacaq. Möhtərəm Prezidentimizin dediyi kimi, Avropa İttifaqı Azərbaycan üçün əsas ticari tərəfdaşdır və nəzərdə tutulan planların icrası ticari dövriyyəni həm Azərbaycan xalqının, həm də Avropa ölkələri xalqlarının rifahı naminə artıracaq. Avropa İttifaqı ilə Azərbaycan arasında münasibətlərin böyük gələcəyi var və bu münasibətlər getdikcə daha da dərinləşəcək və möhkəmlənəcək.

Rüstəm Nağıyev,
YAP Gədəbəy rayon təşkilatının sədri

Tarix: 20-07-2022, 11:07 Oxunub: 100