Almaniya, Avrozona və İngiltərə iqtisadiyyatlarına dair fundamental göstəricilərin proqnozların altında dərc edilməsi, EURUSD və GBPUSD məzənnələrinin ucuzlaşmasına səbəb olmuşdur. Bununla yanaşı, Amerika sessiyasında risk iştahının azalması müşahidə edilir. Bu, Amerikada həm "mavi dalğanın", həm də siyasi xaosun birjalarda təsirinin qiymətləndirilməsində investorların tələsməməsi ilə əlaqədardır. 
Lakin ümumilikdə təhlillər onu deməyə əsas verir ki, hakimiyyətə gələn Demokratların yumşaq monetar və fiskal siyasətin ölkədə inflyasiyanın artması ilə dollar foreks bazarlarında ucuzlaşmaqda davam edə bilər. 
İnvestorlar üçün bu gün Bakı vaxtı ilə saat 17:30-da açıqlanacaq Amerikanın əmək bazarı göstəriciləri də önəmli olacaqdır. 
Əlvan metallar bazarlarında qızılın qiyməti Breksit ticarət sazişinin imzalanmasından və ABŞ-da seçki fonunda yaranan qeyri-müəyyənliyin azalmasından sonra korreksiyaya başlayıb. 
Enerji birjalarında Avropanın Brent nefti önəmli müqavimət səviyyəsinə - 55$-a yaxın ticarət edilir. Növbəti dalğalanma gələcək günlər ərzində yayımlanacaq fundamental göstəricilərdən asılı olacaqdır. Müsbət rəqəmlər qlobal bazarlarda neftə olan tələbin artmasını ehtimal etməyə əsas verir. 
Kriptovalyuta birjalarında isə bitkoin tarixi maksimumlarını yeniləməkdə davam edir. Burada bazarın çox sürətli olduğunu və hər an korreksiyanın başlaya biləcəyi ilə ehtiyatlı davrananlarla, qiymət sıçrayışının yaratdığı gəlir imkanından geri qalmamaq üçün fürsətdən faydalanmaq istəyən treyderlərdən ibarət iki fikir formalaşıb. Ümumilikdə isə qiymətin uzun müddətli perspektivdə fantastik səviyyələrə kimi bahalaşmaqda davam edəcəyi proqnozları tirajlanmaqdadır. 
Məlumat Azərbaycanın İnvestAZ İnvestisiya şirkətinin analitikləri tərəfindən hazırlanıb.