Eldar Quliyev: “Fevralın 7-də seçki məntəqəsinə gedərək öz Prezidentinə səs verən hər bir vətəndaş öz imzasını Azərbaycan tarixinin ən şərəfli səhifəsinə atmış oldu”

ƏVVƏLİ BURADA

Bugünkü buraxılışımızda fevralın 7-də keçirilmiş növbədənkənar Prezident seçkilərinin mahiyyəti, bu seçkilərin ölkəmizin suverenliyinin təsbit olunması baxımından önəmi, bu il dövlətimizin qarşısında duran vacib vəzifələr, eləcə də Azərbaycan ictimaiyyətini maraqlandıran bir sıra digər mövzular barədə aia.az-ın suallarını Milli Məclisin deputatı, Parlamentin Hesablayıcı Komissiyasının sədri, Qara Dəniz İqtisadi Əməkdaşlıq Təşkilatı Parlament Assambleyasının sədr müavini, Azərbaycan Ağsaqqallar Şurasının sədri, iqtisad elmləri doktoru, professor Eldar Quliyev cavablandırır.

- Eldar müəllim, aydındır ki, Qərbdə olan anti-Azərbaycan qüvvələri dedikdə, bu heç də mücərrəd bir ifadə anlamına gəlmir. Yəni bu gün həmin qüvvələrin arxasında ilk növbədə Fransa hökumətinin durduğu məlum həqiqətdir. Bu barədə nə deyə bilərsiz?

- Sizinlə tamamilə razıyam. Bu gün Fransanın ölkəmizə qarşı tutduğu mövqeyi qeyri-konstruktivliyi və ifrat dərəcədə ermənipərəstliyi ilə diqqəti cəlb edir. Mən sizə möhtərəm dövlət başçımızın yanvar ayının 10-da yerli televiziya kanallarına verdiyi müsahibəsində ifadə etdiyi bir fikri xatırlatmaq istəyirəm. Cənab Prezident qeyd etdi ki, bu gün həm Fransada, həm də bir çox digər Avropa ölkələrində böyük nüfuz sahibi olan insanlar siyasət səhnəsində təsadüfi adamlarla – populistlər və demaqoqlarla əvəz olunublar. Bu isə, əlbəttə ki, xoşagəlməz nəticələrə gətirib çıxarır. O cümlədən bu ölkələr tərəfindən Azərbaycanla münasibətlər də artıq fərqli müstəvilərə daşınmaqdadır. Konkret Fransaya gəlincə isə, bu ölkə hələ 2020-ci ildə, Vətən müharibəsinin gedişində də öz ermənipərəst mövqeyini tam ortaya qoyaraq Azərbaycana müxtəlif vasitələrlə təsir etməyə çalışırdı. Lakin bütün bu səylər əlbəttə ki, heç bir nəticə vermədi. Bundan sonra rəsmi Paris gərginliyi artırmaqda davam etdi. Həm parlament, həm də Senat bu gün öz yerini dövlət başçımızın dediyi kimi, tarixin zibilliyində tapmış qondarma “Artsax”ı tanıdılar. Lakin bütün bunlara rəğmən Vətən müharibəsindən sonrakı ilk dövrlərdə ölkələrimiz arasında münasibətlər mövcud idi. Azərbaycanın məcbur olaraq keçirdiyi antiterror əməliyyatından sonra isə, Fransa artıq açıq şəkildə anti-Azərbaycan fəaliyyəti aparmağa başladı. O cümlədən, bu fəaliyyətin mərkəzində qətnamələrin qəbul edilməsi cəhdləri, bundan sonra BMT Təhlükəsizlik Şurası platformasında Azərbaycana qarşı sanksiyalar tələbi durdu. Lakin cənab Prezident İlham Əliyevin illər boyunca apardığı uğurlu xarici siyasətin nəticələri məhz bu məqamda da özünü ən qabarıq şəkildə göstərdi. Ölkələrin əksəriyyəti Azərbaycanı dəstəklədi və Fransanın bütün cəhdləri tam uğursuzluqla nəticələndi.

- Amma bunu da qeyd etməliyik ki, AŞPA-da ölkəmizin nümayəndə heyətinin etimadnəmələrinin qəbul edilməməsinə səbəb olan qalmaqallı təşəbbüs formal olaraq Almaniyalı deputat tərəfindən irəli sürülmüşdür...

- Dediyiniz kimi, yalnız formal olaraq. Reallıqda isə, bu qərəzli kampaniyanın arxasında birbaşa Fransa və AŞPA rəhbərliyinin durduğu danılmaz faktdır. Yeri gəlmişkən, AŞPA-nın sabiq və qüvvədə olan prezidentinin əleyhimizə səs verməsi də təşkilat rəhbərliyinin mövqeyinin bariz göstəricisidir. Fransa isə, müəyyən hallarda öz istəklərini tandem şəklində çıxış etdiyi Almaniya vasitəsilə reallaşdırmağa çalışır. Buna da səbəb Fransanın xarici siyasətində yaşanan ardıcıl uğursuzluqlar və bu ölkənin sürətlə nüfuzdan düşməsidir. Başqa sözlə desək, Fransa Almaniya vasitəsilə AŞPA-nı Azərbaycana qarşı vasitə kimi istifadə etməyə çalışır. Bu ölkələr Azərbaycan Prezidenti cənab İlham Əliyevin müstəqil siyasətini, Ermənistanın məğlubiyyətini və ölkəmizin tam suverenliyinin bərpa olunmasını hələ də həzm edə bilmirlər. Yəqin siz də yaxşı bilirsiniz ki, 2023-cü il aprelin 23-də Azərbaycan tərəfindən Laçın sərhəd-buraxılış məntəqəsi qurulandan sonra bəzi Qərb təsisatları, o cümlədən AŞPA dəfələrlə Azərbaycana qarşı həmin sərhəd-buraxılış məntəqəsinin ləğv edilməsi kimi absurd tələb irəli sürmüşdü. Ona görə absurd deyirəm ki, bu tələb faktiki olaraq suveren bir ölkənin daxili işlərinə qarşmaq cəhdi olmaqdan başqa, həm də dolayısı ilə Ermənistandan Azərbaycan ərazisində o zaman hələ mövcud olan qeyri-qanuni erməni silahlı birləşmələri üçün canlı qüvvə, silah-sursat, mina, eləcə də digər hərbi təyinatlı vasitələrin daşınmasının qarşısını almamağa bir çağırış anlamına gəlirdi. Bunda da məqsəd Azərbaycanı zəif salmaq, regionda sabitliyi pozmaq və hərbi münaqişəni yenidən qızışdırmaqdan ibarətdir. Lakin Azərbaycan dövləti bütün bu cəhdlərin qarşısını qətiyyətlə alıb və bundan sonra da alacaq. Möhtərəm Prezidentimiz cənab İlham Əliyev dəfələrlə belə fikirdə olan qüvvələrə öz mesajını tam aydın şəkildə çatdırıb – heç kim ölkəmizlə təhdid dilində danışa bilməz, heç bir qüvvə Azərbaycan dövləti ilə manipulyasiya edə bilməz.

- Eldar müəllim, az öncə də dediyim kimi, məni seçkilərlə bağlı bir məqam da maraqlandırır ki, bu barədə fikrinizi öyrənmək istərdim. Nəticələr elan olunduqdan sonra digər namizədlər dövlət başçımızı inamlı qələbə münasibətilə təbrik etdilər və öz müşahidəçilərinin rəylərinə əsaslanaraq seçki prosesinin heç bir qanun pozuntusuna yol verilmədən getdiyini bir daha təsdiq etdilər. Prezident seçkilərində məğlub olan namizədlərin belə mövqe nümayiş etdirmələrini necə qiymətləndirirsiniz?

- Bu, bütün sivil ölkələrdə Prezident seçkiləri ilə bağlı qəbul olunmuş bir etiket qaydasıdır ki, məğlub olan namizədlər yeni seçilən Prezidenti təbrik edirlər. Amma düşünürəm ki, bizim halda bu təbriklər heç də sadəcə protokol tələbinin icrası deyildi. Məsələ bundadır ki, zənnimcə hələ seçki kampaniyalarına start verməkdən öncə də digər namizədlər son nəticəyə dair heç bir illyüziya yaşamırdılar. Prezident İlham Əliyevin bu seçkilərdə də alternativsiz Lider olduğu və mütləq qələbə qazanacağı heç bir digər namizəddə şübhə doğura bilməzdi. Lakin ölkəmizdə çoxpartiyalı siyasi sitemin mövcudluğu da bir reallıqdır. Öz namizədliyini irəli sürən hər bir partiya lideri və ya müstəqil namizəd də ilk növbədə məhz bu reallığı təsbit etmiş oldu. Nəticələrə bir daha nəzər salsaq, bəzi namizədlərin hətta 2 faiz civarında səs topladığını da görərik ki, bu da təxminən yüz min nəfərə yaxın seçici səsi deməkdir. Yəni bu göstərici də ölkəmizdə həqiqi demokratik siyasi sistemin mövcudluğunu bir daha nümayiş etdirir. Əminəm ki, Prezident seçkilərində iştirak etmiş və məğlub olmuş hər bir namizəd xalqın iradəsini əsas meyar kimi qəbul edir və dövlət başçımıza ünvanladığı təbrikində də tamamilə səmimidir. Azərbaycan xalqı isə, 2003-cü ildə etdiyi tarixi seçimini bir daha təsdiqlədi və bu seçimin öz ali iradəsinin ifadəsi olduğunu bütün dünyaya təkrar nümayiş etdirdi.

- Bir qədər əvvəl Siz cənab Prezident İlham Əliyevin yanvarın 10-da yerli telekanallara verdiyi müsahibəsini xatırlatdınız. Dövlət başçımızın həmin müsahibəsində Azərbaycanın qarşısında duran növbəti vəzifələr barədə verdiyi açıqlamaları necə şərh edə bilərsiz?

- İlk növbədə mən qeyd etmək istərdim ki, cənab Prezident İlham Əliyevin qarşıda duran vəzifələr barədə səsləndirdiyi fikirlər əslində Azərbaycanın perspektiv inkişaf konsepsiyasının tərkib hissələridir. Həmin tarixi müsahibəsində dövlət başçısı birmənalı olaraq bildirdi ki, Azərbaycan artıq yeni dövrə qədəm qoymuşdur və bu dövrün yeni hədəfləri olmalıdır. Həmçinin cənab Prezident xüsusi olaraq vurğuladı ki, Azərbaycan cəmiyyətində heç bir halda sakitləşmə ovqatı yaradılmamalıdır. Bu həqiqətən də çox vacib bir məqamdır. Biz hər zaman çox ayıq olmalıyıq, çünki ölkəmizə qarşı olan hərəkətlər, bundan sonra da davam edəcək. Dövlət başçımızın dediyi kimi, Azərbaycan elə bir Zəfər çalıb ki, bu, lokal əhəmiyyətli məsələ deyil. Buna görə də ölkəmizə qarşı ənənəvi mənbələrdən gələn mənfi münasibət dayanmayacaq. Lakin bütün bunlara baxmayaraq Azərbaycan yenə də quracaq, yaradacaq, inkişaf edəcək və özünün daha parlaq gələcəyinə doğru yoluna inamla davam edəcək. Elə 7 fevral Prezident seçkilərinin möhtəşəm nəticələri də Azərbaycanın öz parlaq gələcəyini sarsılmaz təməllər üzərində quracağına olan əminliyin daha bir nümayişidir. Bu münasibətlə bir daha, başda möhtərəm Prezidentimiz cənab İlham Əliyev olmaqla, hamımızı, bütün Azərbaycan xalqını ürəkdən təbrik edirəm, ölkəmizə, xalqımıza yeni-yeni uğurlar, parlaq qələbələr arzulayıram.

- Eldar müəllim, hər zaman olduğu kimi, səmimi və ətraflı müsahibənizə görə Sizə həm oxucularımız adından, həm də bütün redaksiya heyətimiz adından səmimi minnətdarlığımızı bildirirəm. Sağ olun, sağlıqla qalın.

- Mən də sizə dolğun və məzmunlu suallarınıza görə təşəkkür edirəm. Sağ olun.

Söhbətləşdi: Azər Məmmədov

Tarix: 10-02-2024, 08:28 Oxunub: 10