Aqiyə Naxçıvanlı: Azərbaycan-Türkiyə birliyinin möhkəmlənməsi bütün Türk dünyasının inkişafına xidmət edir

Mayının 14-də Azərbaycan Prezidenti İlham Əliyevin Türkiyə Prezidenti Rəcəb Tayyib Ərdoğanın dəvəti ilə qardaş ölkəyə işgüzar səfər etməsi və dövlət başçılarının Rize-Artvin Hava Limanının açılış mərasimində birgə iştirakı ölkələrimiz arasında münasibətlərin sürətli inkişafının daha bir göstəricisidir. İki qardaş ölkənin əldə etdiyi uğur və nailiyyətlər təkcə Azərbaycan və Türkiyənin deyil, bütün Türk dünyasının inkişafına, güclənməsinə xidmət edir. Bu baxımdan yeni hava limanına göyərtələrində Türkiyə Prezidenti Rəcəb Tayyib Ərdoğanın və Azərbaycan Prezidenti İlham Əliyevin olduqları təyyarələrin ilk dəfə eniş etmələri də böyük siyasi məna kəsb edir. Bu fakt Azərbaycan ilə Türkiyə arasında mövcud olan və getdikcə möhkəmlənən sarsılmaz birliyin, ölkələrimizin birgə getdikləri yüksəliş və inkişaf yolunun bariz təcəssümüdür. Azərbaycan və Türkiyə prezidentlərinin görüşündə ölkələrimiz arasında ikitərəfli dostluq və qardaşlıq münasibətlərinin bütün sahələrdə uğurla inkişaf etdiyi bildirilib. Həmçinin xüsusi olaraq vurğulanıb ki, Azərbaycan və Türkiyə arasında siyasi əlaqələr yüksək səviyyədədir.

AZƏRTAC xəbər verir ki, bu sözləri Milli Məclisin deputatı Aqiyə Naxçıvanlı söyləyib.

Deputat, ilk növbədə, Türkiyə-Azərbaycan birliyinin hər iki ölkənin xalqları üçün vacib əhəmiyyətindən danışaraq qeyd edib ki, Türkiyə və Azərbaycan, sadəcə, dost və qardaş ölkələr deyil, həm də strateji müttəfiqdirlər. “Prezident İlham Əliyev Rizedə çıxışında xüsusi olaraq vurğuladı ki, hava limanının açılış mərasimində Azərbaycan Prezidentinin iştirakı Türkiyə-Azərbaycan birliyinin növbəti təzahürüdür. Azərbaycan 44 günlük Vətən müharibəsində əldə etdiyi tarixi Qələbə ilə torpaqlarını işğaldan azad etdi. Bununla da öz ərazi bütövlüyünü təmin edən ölkəmiz tarixi ədaləti bərpa etmiş oldu. Prezident İlham Əliyevin dediyi kimi, İkinci Qarabağ müharibəsi başlanan gündən, ilk saatlardan Türkiyə Prezidenti Rəcəb Tayyib Ərdoğan Azərbaycana birmənalı, dəqiq və açıq dəstək ifadə etmişdir. Müharibənin ilk saatlarından o demişdir ki, Azərbaycan tək deyil. Bu, həm bizi ruhlandırdı, eyni zamanda, müdaxilə etmək fikrində olan bütün qüvvələri, dairələri dayandırdı, durdurdu. Bu gün isə ölkəmiz işğaldan azad edilmiş ərazilərdə böyük vüsətlə bərpa-quruculuq işlərini həyata keçirir. Təbii ki, bu işlərdə qardaş Türkiyənin rolu böyükdür. O cümlədən, Şuşa şəhərində qardaş Türkiyənin baş konsulluğunun açılmasına dair bir müddət əvvəl qəbul olunmuş qərar iki ölkə arasında diplomatik münasibətləri dərinləşdirməklə yanaşı həm də iqtisadi hədəfləri nəzərdə tutur. Belə ki, bu gün işğaldan azad olunmuş ərazilərdə aparılan yenidənqurma və bərpa işlərində də Azərbaycan ilə Türkiyə arasında sıx əməkdaşlıq mövcuddur və bu işlərdə Türkiyə aparıcı rollardan birinə sahibdir”, - deyə A.Naxçıvanlı vurğulayıb.

A.Naxçıvanlı, həmçinin qeyd edib ki, ölkələrimiz və xalqlarımız arasındakı sarsılmaz dostluq və qardaşlıq münasibətlərinin daha da möhkəmlənməsində, eləcə də əməkdaşlıq əlaqələrinin daha yüksək mərhələyə keçidinin təmin olunmasında məhz Şuşa Bəyannaməsi xüsusi rol oynayıb: “Məlum olduğu kimi, 2021-ci il iyunun 15-də Şuşa şəhərində Azərbaycan və Türkiyə arasında müttəfiqlik münasibətləri haqqında Bəyannamə imzalanıb. Strateji əhəmiyyət kəsb edən bu tarixi sənəd əməkdaşlığın bütün istiqamətlərini əhatə edir. Prezident İlham Əliyevin dediyi kimi, biz həm dostuq, həm qardaşıq, həm də artıq rəsmən müttəfiqik. Faktiki olaraq Şuşa Bəyannaməsi ulu öndər Heydər Əliyevin “Bir millət, iki dövlət” və Mustafa Kamal Atatürkün “Azərbaycanın sevinci bizim sevincimiz, kədəri bizim kədərimizdir” kəlamlarının strateji müttəfiqlik konsepsiyasına çevrilməsini təsdiq edən bir tarixi sənəddir. Bu müttəfiqliyin ən önəmli tərəfi də məhz hərbi sahədə əməkdaşlığın təmin edilməsidir. Belə ki, Bəyannamədə müdafiə sahəsində əməkdaşlıq və qarşılıqlı hərbi yardım məsələləri öz əksini tapır. Şuşa Bəyannaməsi mahiyyət etibarı ilə gələcəyimizə, hər iki ölkənin stabil, inkişaf edən və təhlükəsiz gələcəyinin təmin olunmasına hesablanmış unikal tarixi sənəddir. Birmənalı olaraq qeyd etmək lazımdır ki, bu gün Azərbaycan-Türkiyə münasibətlərinin inkişafı bütün Türk dünyasının maraqlarına cavab verən və regional təhlükəsizliyin təmin olunmasını önə çıxaran çox vacib bir məqamdır”, – deyə deputat fikirlərini tamamlayıb.

Tarix: 17-05-2022, 17:33 Oxunub: 96