Səttar Möhbalıyev: “Dövlətimizin başçısının İtaliyaya səfəri iki ölkə arasındakı münasibətləri yeni müstəviyə yüksəldəcək”

“Məlumdur ki, Prezident İlham Əliyevin beynəlxalq təşkilatların yüksək tribunasında irəli sürdüyü qlobal səviyyəli təşəbbüslər beynəlxalq aləm tərəfindən rəğbətlə qarşılanır və yüksək səviyyədə dəstəklənir. Dərin və hərtərəfli biliyə, yüksək siyasi mədəniyyətə malik olan cənab İlham Əliyev dünyada böyük hörmət və nüfuz sahibi olan lider kimi qloballaşma və inteqrasiya proseslərində, beynəlxalq görüşlərdə və apardığı yüksək səviyyəli danışıqlarda Azərbaycanın mənafelərini uğurla təmsil və müdafiə edir. Fəxarətlə deyə bilərik ki, dövlətimizin başçısı dünyada dərin analitik təfəkkürə və siyasi iradəyə malik lider kimi qəbul olunur. Qətiyyəti, diplomatik məharəti onu dünyanın nüfuzlu siyasi rəhbərləri cərgəsinə çıxarıb. Ona görə Azərbaycan Prezidentinin şəxsiyyəti bu gün beynəlxalq səviyyədə ehtiramla qəbul olunur. Təsadüfi deyil ki, dövlət başçısının hadisələrə baxışı, münasibəti hər bir beynəlxalq tədbirin diqqətlə izlənilən məqamlarındandır. Məhz bunun nəticəsidir ki, Azərbaycanın beynəlxalq və regional problemlərin həllində rolu və nüfuzu getdikcə yüksəlməkdədir. Bu baxımdan “The European House – Ambrosetti” beyin mərkəzinin İtaliyanın Çernobbio şəhərində “Dünya, Avropa və İtaliyaya baxış” və “Rəqabətli strategiyalar üçün bu günün və sabahın ssenarisi” mövzusunda keçirdiyi 48-ci Beynəlxalq Çernobbio Forumuna dövlətimizin başçısı cənab İlham Əliyevin İtaliya Prezidenti Sercio Mattarella, İtaliya Nazirlər Şurasının Sədri Mario Draqin, həmçinin beyin mərkəzi tərəfindən əsas qonaq qismində dəvət olunması Azərbaycanın beynəlxalq səviyyədə möhkəmlənən mövqelərini əks etdirməklə yanaşı, həm də dövlətimizin başçısının şəxsi nüfuzunu göstərir.”

Bu fikirləri mətbuata açıqlamasında Azərbaycan Həmkarlar İttifaqları Konfederasiyasının sədri, Milli Məclisin deputatı Səttar Möhbalıyev deyib.

“Prezident İlham Əliyev 48-ci Beynəlxalq Çernobbio Forumunun plenar iclasında “Enerji təhlükəsizliyinin təmin olunmasında Azərbaycanın rolu” mövzusunda çıxış edərək bu sahədə ölkəmizin əhəmiyyətini və rolunu daha aydın şəkildə izah etdi. Bildiyimiz kimi, hazırda Azərbaycan dünyanın, o cümlədən Avropanın enerji təhlükəsizliyində oynadığı rola görə diqqət mərkəzindədir. Beynəlxalq aləmin etiraf etdiyi kimi, ölkəmiz artıq regionun enerji mərkəzinə çevrilib. İndi dünyada bu istiqamətdə baş verən böhranın aradan qaldırılmasında Azərbaycanın malik olduğu potensial çox yüksək dəyərləndirilir. Bütün bunlar dövlətimizin başçısı cənab İlham Əliyev tərəfindən həyata keçirilən uğurlu enerji siyasətinin ən bariz göstəricisidir. Yeri gəlmişkən, Cənub Qaz Dəhlizinin enerji böhranının yaşandığı bir dönəmdə Avropanın enerji təminatında əhəmiyyəti çox böyükdür. Onu da qeyd edim ki, bu layihənin reallaşdırılması ölkəmizin gücünü və qüdrətini bir daha ortaya qoyur. Layihənin uğurla həyata keçirilməsində Azərbaycan öz üzərinə düşən vəzifələri nümunəvi şəkildə icra edir, öz öhdəliklərinə hər zaman sadiqlik sərgiləyir və etibarlı tərəfdaş olaraq dünya dövlətləri tərəfindən təqdir olunur”, - deyə deputat bildirib.

AHİK sədri qeyd edib ki, bu gün Azərbaycan-İtaliya əlaqələri qarşılıqlı hörmətə və yüksək etimada əsaslanaraq bir çox sahələrdə yüksələn xətlə inkişaf etməkdədir: “Prezident İlham Əliyevin bu ölkəyə səfərinin əlaqələrimizin inkişafı və genişlənməsi baxımından səmərəli olacağına əminəm. Azərbaycan son bir il yarım ərzində Avropaya 13,5 milyard kubmetr qaz nəql edib ki, bunun da 11,7 milyard kubmetri İtaliyanın payına düşür. Təbii ki, qısa müddət ərzində bu, yüksək göstəricidir. Dövlətimizin başçısı bu il həcmi artırmağı və İtaliya bazarına 10 milyard kubmetr qaz nəql etməyin planlaşdırıldığını vurğuladı. Bu da dövlətimizin bu istiqamətdə artan rolunu bir daha təsdiqləyir və əlaqələrimizin daha da inkişafına münbit şərait yaradır”.
“Əlaqələrimizin genişlənməsi baxımından təhsil sahəsinin önəmini xüsusi qeyd etmək istərdim. Səfər zamanı bu məsələ də diqqət mərkəzində oldu. İnanıram ki, İtaliya-Azərbaycan Universiteti üzrə əməkdaşlıq çərçivəsinin müəyyən edilməsi, fakültə və proqramların yaradılması ilə bağlı ADA Universiteti ilə İtaliyanın beş aparıcı ali təhsil müəssisəsi - Luiss Guido Carli Universiteti, Romanın Sapienza Universiteti, Turin Politexnik Universiteti, Alma Mater Bolonya Universiteti və Milan Politexnik Universiteti arasında akademik əməkdaşlığa dair Sazişin imzalanması bu sahədə də əlaqələrimizin dinamik inkişafını təmin edəcək, iki ölkə arasında dostluq münsibətlərini möhkəmləndirəcək”, - AHİK sədri vurğulayıb.

“Səfər çərçivəsində Prezident İlham Əliyev yerli “İl Sole 24 Ore” qəzetinə müsahibəsində qalib ölkə olan Azərbaycanın haqlı mövqeyi, regionda vəziyyətin sülhə doğru inkişafı baxımından aparılan danışıqlar, Ermənistanın işğalından azad edilmiş Azərbaycan ərazilərində infrasturukturun yaradılması istiqamətində görülən işlər barədə məlumat verdi. Qeyd edim ki, artıq Azərbaycanın Qarabağ münaqişəsini həll etməklə müəllifi olduğu dəyişməz reallıqlar bütün tərəflərin maraqlarına tam uyğundur. Biz bunu beynəlxalq təşkilatların, vəziyyətə münasibət bildirən dövlətlərin davranışlarından da aydın görürük. Azərbaycan işğala son qoymaqla regionu Ermənistanın yaratdığı çirkabdan çıxararaq sürətli inkişaf yoluna yönəldib. Bu, bütövlükdə region ölkələrinin siyasi-iqtisadi maraqlarına cavab verir. Məlumdur ki, sülh müqaviləsinin imzalanması üçün aparılan bütün danışıqlar Azərbaycanın milli maraqları çərçivəsində və irəli sürdüyü təkliflər əsasında aparılır. Dövlətimizin irəli sürdüyü 5 təklifdəki əsas məqam Azərbaycanın ərazi bütövlüyüdür. Məğlub Ermənistan Azəbaycan Prezidentinin siyasi qərarları ilə razılaşmaq məcburiyyətindədirlər. Çünki bu gün regionda diktəni Qalib Komandan cənab İlham Əliyev edir”, - S.Möhbalıyev əlavə edib.

Tarix: 5-09-2022, 11:09 Oxunub: 44