Azərbaycanın sayəsində isinən Avropadan SOYUQ MÜNASİBƏT - Çörəyimizin DUZU YOXDUR...

Dörd ölkə Avropa İttifaqından Azərbaycan qazının nəqlini təmin etməyi xahiş edib.

Bu barədə Macarıstanın xarici işlər və ticarət naziri Peter Siyarto Budapeştdə səfərdə olan Azərbaycanın iqtisadiyyat naziri Mikayıl Cabbarovla birgə keçirdiyi mətbuat konfransında deyib.

O bildirib ki, Azərbaycanda təbii qaz hasilatının artması Macarıstanın və Mərkəzi Avropanın enerji təhlükəsizliyində mühüm rol oynaya bilər

“Lakin bu, regionda müvafiq infrastrukturun inkişafını tələb edir ki, bunun qurulması üçün də Avropa İttifaqının dəstəyi lazımdır. Avropada yaranmış enerji böhranı səbəbindən Azərbaycanın enerji resurslarının vacibliyi artıb. Qısa və uzunmüddətli dönəmdə Avropanın enerji diversifikasiyasında Azərbaycandan idxal olunan qaz vacib rol oynaya bilər. Mümkün qədər tez zamanda Azərbaycanın resurslarından istifadə etmək bizim ölkəmizin marağındadır, lakin bunun üçün Cənub-şərqi və Mərkəzi Avropada lazımi infrastuktur qurulmalıdır”.

Nazir vurğulayıb ki, Bolqarıstan, Rumıniya və Slovakiya ilə Macarıstan bu məsələ ilə bağlı Avropa Komissiyasına müraciət edib.

Reallıq budur ki, Avropa enerji məsələlərinə görə də Azərbaycanla münasibətdə diqqətli olmalıdır. Sərsəm bəyanatlar verməkdənsə, Azərbaycanın bu sahədə də necə vacib bir rol oynadığı nəzərə alınmalıdır.

DİA.AZ-ın məlumatına görə, mövzu ilə bağlı Cebhe.info-ya açıqlama verən iqtisadçı-alim Fuad İbrahimov bildirib ki, siyasi bəyanatlardan asılı olmayaraq, iqtisadiyyat öz siyasətini yürüdür:

“Bu günləri səsləndirilən siyasi bəyanatlar daha çox populizm üzərində qurulub. Onlar bunu əsassız polemikaya çevirərək siyasi ambisiyalarını dolayı yolla həyata keçirmək məqsədi güdürlər.

Yəni belə fikirlərin hər hansısa bir əsası yoxdur. Amma iqtisadi fikirlər və istək öz yerini tutur. Bu gün Azərbaycan Avropanın enerji təhlükəsizliyi istiqamətində mərhələli şəkildə qabağa gedir. Artıq bizim xüsusi çəkimiz xeyli artıb.

Yəni yuvarlaq olaraq Avropanın qaz təchizatının 2 faizini təşkil edirik. Bu, perspektivdə 4 faizə qədər arta bilər. İrimiqyaslı layihələrin həyata keçməsi və mövcud layihələrin şaxələnməsi ilə Macarıstan, Bolqarıstan, Albaniya və Slovakiya kimi ölkələri, İtaliyanın müəyyən bir həcmini təmin edə bilər.

Bunun üçün mövcud texniki imkanlarımız var və əsas göstərici də məhz budur. Digər ölkələr də bizim layihələrimizə qoşularsa və layihələrimiz şaxələnərsə, nüfuzumuz artacaq. Bununla da mərhələli şəkildə Azərbaycanın nüfuzu və əvəzolunmazlığı təmin ediləcək. Siyasi əsası olmayan və kiməsə xoş gəlməsi üçün verilən sərsəm bəyanatlar da öz qüvvəsini itirəcək. Bu, birmənalıdır”.

Ekspert əlavə edib ki, bu gün Azərbaycan Şərqlə Qərb arasında yeganə elastik dəhlizdir:

“Həmçinin, logistika ilə daşınan malların qısa zamanda getməsi qiymətəmələgəlmə prosesinə müsbət təsir edir. Bu gün perimetr boyu coğrafi xəritəyə baxdıqda, Rusiyanın şimalından İranın cənubuna qədər ən elastik dəhliz Azərbaycana məxsus olduğunu görürük. Azərbaycan ərazisi mövcud layihələri və kommunikasiya xətləri ilə ən cazibədar bir ərazidir”.

Tarix: 26-01-2023, 15:30 Oxunub: 61